កាណាដា បញ្ឈប់ទូតប្រចាំនៅប្រទេសចិន ពាក់ព័ន្ធនឹងករណី Huawei

2019-01-28 04:13:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកនាយករដ្ឋមន្ត្រីប្រទេសកាណាដា Justin Trudeau បានដកតំណែងលោក John McCallum ឯកអគ្គរដ្ឋទូតកាណាដាប្រចាំនៅប្រទេសចិន ជុំវិញករណីរបស់លោកស្រី Meng Wanzhou ប្រធានផ្នែកហិរញ្ញវត្ថុនៃក្រុមហ៊ុនចិន Huawei ។ នេះបើយោងតាមការចុះផ្សាយរបស់ BBC កាលពីថ្ងៃទី២៧ ខែមករា ឆ្នាំ២០១៩។

លោក Justin Trudeau និង លោក John McCallum (រូបថត៖ Reuters)

ការដកតំណែងនេះ ត្រូវបានសម្រេចបន្ទាប់ពីលោក John McCallum បានបង្កភាពតានតឹងបន្ថែម ដោយលោកបានលើកឡើងពីការធ្វើបត្យាប័នលោកស្រី Meng ដែលត្រូវបានស្នើដោយសហរដ្ឋអាមេរិក នាពេលកន្លងទៅ។ លោក McCallum បានថ្លែងកាលពីថ្ងៃសុក្រសប្ដាហ៍មុនថា វាជារឿងល្អបំផុត សម្រាប់កាណាដា ប្រសិនបើអាមេរិក បោះបង់ចោលការស្នើធ្វើបត្យាប័នមន្ត្រីជាន់ខ្ពស់របស់ Huwei រូបនេះ។

លោកនាយករដ្ឋមន្ត្រីកាណាដា បានមានប្រសាសន៍ក្នុងសេចក្ដីថ្លែងការណ៍មួយថា លោកបានស្នើឲ្យលោក McCallum ចុះចេញពីតំណែងជាឯកអគ្គរដ្ឋទូតកាណាដាប្រចាំនៅប្រទេសចិន ដោយលោកមិនបានផ្ដល់មូលហេតុណាមួយឡើយ។

រូប៖ AP

លោក McCallum ត្រូវបានតែងតាំងជាឯកអគ្គរដ្ឋទូតកាណាដាប្រចាំនៅប្រទេសចិន កាលពីឆ្នាំ២០១៧ បន្ទាប់ពីលាលែងពីតំណែងរដ្ឋមន្ត្រីអន្តោប្រវេសន៍។ លោកធ្លាប់ជារដ្ឋមន្ត្រីក្រសួងការពារជាតិ ចន្លោះពីឆ្នាំ២០០២ ដល់ ២០០៣ ផងដែរ។

សូមជម្រាបថា ការស្នើធ្វើបត្យាប័នលោកស្រី Meng ដោយសហរដ្ឋអាមេរិក បានធ្វើឲ្យមានប្រតិកម្មយ៉ាងខ្លាំងពីសំណាក់ក្រុងប៉េកាំង និងធ្វើឲ្យទំនាក់ទំនងរវាងកាណាដា ជាមួយចិន កាន់តែធ្លាក់ចុះថែមទៀត៕

អត្ថបទទាក់ទង

ប្រភព៖ BBC ប្រែសម្រួល៖ លាភ.