រកឃើញសំបុកសត្វស្លាបតំណាងជាតិចំនួន១៦ នៅដែនជម្រកសត្វព្រៃលំផាត់ ក្នុងឆ្នាំ២០១៨

2019-01-28 07:13:52
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្នុងរដូវបន្តពូជឆ្នាំ២០១៨ សំបុកសត្វត្រយ៉ងយក្សចំនួន១៦សំបុក ត្រូវបានបានរកឃើញ និងអង្កេតតាមដាននៅដែនជម្រកសត្វព្រៃលំផាត់។ ក្នុងនោះសំបុកចំនួន២ ត្រូវបានបរាជ័យដោយសារការរំខានរបស់មនុស្ស និងត្រូវបានសត្វបោះបង់ចោលដោយមិនដឹងមូលហេតុ។ ដោយឡែកកូនចំនួន ១៩ក្បាលត្រូវធំលូតលាស់ពីសំបុកចំនួន១៣ទៀតដែលនៅសល់។ នេះបើតាមការចុះផ្សាយរបស់អង្គការ BirdLife International Cambodia Programme កាលពីថ្ងៃទី២៧ ខែមករា ឆ្នាំ២០១៩។

សំបុកសត្វត្រយ៉ងយក្ស (រូបថត៖ អង្គការ BirdLife International Cambodia Programme)

អង្គការនេះបញ្ជាក់ថា បើប្រៀបធៀបជាមួយលទ្ធផលនៃការរកឃើញសំបុកសត្វនេះ ក្នុងឆ្នាំ២០១៦ គឺកើនឡើង៦០០% និងកើនឡើង ១៧៨% បើប្រៀបធៀបនឹងការរកឃើញក្នុងឆ្នាំ២០១៧។ «នេះគឺជាកំណត់ត្រាថ្មីនៃចំនួនសំបុកអតិបរមានៅតំបន់ទេសភាពនេះ តែទោះជាយ៉ាងណាយើងមិនអាចសន្និដ្ឋានថាចំនួនបក្សីជាតិនេះ មានការកើនឡើងនោះទេ»។

អង្គការដដែលនេះ បានលើកឡើងថា មានកត្តាជាច្រើន ដែលដែនជម្រកសត្វព្រៃនេះកំពុងប្រឈម (ដូចជាការបាត់បង់ទីជម្រកជាដើម) ក៏ប៉ុន្តែតម្លៃជីវចម្រុះនៃតំបន់ទេសភាពនេះ នៅតែមានសក្តានុពលខ្ពស់។

ត្រយ៉ងយក្ស ជាសត្វស្លាបតំណាងឲ្យប្រទេសកម្ពុជា ស្ថិតក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជបំផុតនៅលើសកលលោក។ ពួកវាមានរស់នៅតែក្នុងប្រទេសកម្ពុជា និងឡាវ ប៉ុណ្ណោះ ក្នុងនោះ ៩៩% គឺមានវត្តមាននៅកម្ពុជា។

សូមរំលឹកថា កាលពីចុងឆ្នាំ២០១៨កន្លងទៅ ក្រុមសិក្សាស្រាវជ្រាវជីវចម្រុះ នៅដែនជម្រកសត្វព្រៃសៀមប៉ាង និងសៀមប៉ាងខាងលិច ក៏បានរកឃើញផងដែរនូវសំបុកត្រយ៉ងយក្សចំនួន១៦ (ក្នុងនោះ ១២សំបុក ញាស់បានកូន ១៧ក្បាលដោយជោគជ័យ) និងសំបុកសត្វត្មាតចំនួន ១១សំបុក (៩សំបុកត្មាតត្នោត និង២សំបុកត្មាតភ្លើង)៕

ចុចអាន៖