ឡាវ កំពុងជំរុញការផ្តល់សេវាដើម្បីផ្គាប់ចិត្តអ្នកទេសចរចិន
- 2019-01-28 08:25:13
- ចំនួនមតិ 0 | ចំនួនចែករំលែក 0
ឡាវ កំពុងជំរុញការផ្តល់សេវាដើម្បីផ្គាប់ចិត្តអ្នកទេសចរចិន
ចន្លោះមិនឃើញ
ក្រុមហ៊ុនអាជីវកម្មដែលពាក់ព័ន្ធនឹងទេសចរណ៍ក្នុងប្រទេសឡាវ ត្រូវបានជំរុញឱ្យផ្តល់សេវាកាន់តែសមរម្យ ដើម្បីទាក់ទាញអ្នកទេសចរចិន ខណៈដែលឡាវរំពឹងថា នឹងទទួលបានភ្ញៀវចិនប្រមាណ ១លាននាក់ ក្នុងចំណោមភ្ញៀវសរុប ៥លាននាក់ នៅឆ្នាំ២០១៩។ នេះបើតាមការចុះផ្សាយរបស់ Vientiane Times នៅថ្ងៃទី២៨ ខែមករា ឆ្នាំ២០១៩។
លោក Daovone Phachanthavong អនុប្រធានសភាពាណិជ្ជកម្ម និងឧស្សាហកម្មឡាវ បាននិយាយថា សណ្ឋាគារ ផ្ទះសំណាក់ ភោជនីយដ្ឋាន និងភ្នាក់ងារទេសចរណ៍ គួរតែព្យាយាមផ្តល់សេវាក្នុងតម្លៃមួយដែលអាចឆ្លើយតបទៅនឹងការរំពឹងរបស់ភ្ញៀវទេសចរចិន។
លោកលើកឡើងថា៖ «ប្រជាជនចិន ចូលចិត្តដើរផ្សារទិញទំនិញក្នុងប្រទេសឡាវ ប៉ុន្តែក្រុមហ៊ុនក្នុងស្រុក បែរជាខំប្រឹងផ្តល់ឱ្យពួកគេនូវអាហារ និងទំនិញដែលក្រុមហ៊ុនទាំងនោះពេញចិត្តខ្លួនឯងទៅវិញ»។
លោកDaovone បន្ថែមថា ការប្រើប្រាស់ភាសាចិន ការយល់ដឹងពីអាហារ និងរបៀបរបបរបស់ចិន នឹងជួយឱ្យក្រុមហ៊ុនផ្តល់សេវា បង្កើនទំនាក់ទំនងជាមួយភ្ញៀវ។ សញ្ញាសម្គាល់ និងខិត្តបណ្ណជាភាសាចិន ក៏គួរតែត្រូវបានដាក់ផងដែរ នៅតាមទីកន្លែងទេសចរណ៍។
សូមរំលឹកថា កាលពីឆ្នាំ២០១៨ ឡាវទទួលបានអ្នកទេសចរចិន ប្រមាណជាង ៨០ម៉ឺននាក់ ក្នុងចំណោមភ្ញៀវសរុប ៤,១លាននាក់ ដែលបានកើនឡើង ២៦% បើប្រៀបធៀបនឹងឆ្នាំ២០១៧។ នេះបើតាមទិន្នន័យរបស់ក្រសួងព័ត៌មាន វប្បធម៌ និងទេសចរណ៍ឡាវ។
កាលពីថ្ងៃទី២៥ ខែមករា ឆ្នាំ២០១៩កន្លងទៅ ឡាវ និងចិន បានបើកជាផ្លូវការនូវព្រឹត្តិការណ៍ទេសចរណ៍ "Visit Laos-China Year 2019" នៅសាលវប្បធម៌ជាតិក្នុងក្រុងវៀងចន្ទន៍ ក្នុងក្តីសង្ឃឹមថា ប្រទេសទាំង២ នឹងកាន់តែក្លាយជាគោលដៅទេសចរណ៍ជាទីជាប់ចិត្ត៕