រដ្ឋមន្រ្តីការបរទេស អំពាវនាវឱ្យ NGO បរទេស ជៀសវាងជាប់ពាក់ព័ន្ធនឹងភេរវកម្ម និងអាវុធប្រល័យលោក

2019-01-29 03:15:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ បានអំពាវនាវឱ្យអង្គការមិនមែនរដ្ឋាភិបាលបរទេស ជៀសវាងជាដាច់ខាតនូវ សកម្មភាពទាំងឡាយណាដែលអាចជាប់ពាក់ព័ន្ធ ឬគាំទ្រដល់ការលាងសម្អាតប្រាក់ ហិរញ្ញប្បទានភេរវកម្ម និងហិរញ្ញប្បទានអាវុធមហាប្រល័យ ដែលបានកំណត់ឡើងដោយក្រុមប្រទេសអាស៊ីប៉ាស៊ីហ្វិកស្តីពីការសម្អាតប្រាក់ ដើម្បីជៀសផុតពីការធ្លាក់ចូលទៅក្នុងបញ្ជីប្រផេះរបស់ស្ថាប័ននេះ និងកុំឲ្យមានជាបច្ច័យអវិជ្ជមានដល់កម្ពុជា លើផ្នែកប្រព័ន្ធហិរញ្ញវត្ថុ លំហូរវិនិយោគ និងនយោបាយជាដើម។

ការអំពាវនាវខាងលើនេះ ធ្វើឡើងក្នុងកិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស ដែលរៀបចំឡើងដោយក្រសួងការបរទេស នាព្រឹកថ្ងៃទី២៩ ខែមករា ឆ្នាំ២០១៩។

លោក ប្រាក់ សុខុន អញ្ជើញធ្វើជាអធិបតីក្នុងកិច្ចប្រជុំពិគ្រោះយោបល់រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស នាព្រឹកថ្ងៃទី២៩មករា ២០១៩

លោកបានស្នើឱ្យអង្គការមិនមែនរដ្ឋាភិបាលបរទេសទាំងអស់ ធ្វើប្រតិបត្តិការហិរញ្ញវត្ថុរបស់ខ្លួន តាមប្រព័ន្ធធនាគារដែលស្របច្បាប់ និងមានអាជ្ញាប័ណ្ណផ្លូវការចេញដោយធនាគារជាតិនៃកម្ពុជា និងស្នើឱ្យអនុវត្តសកម្មភាពរបស់ខ្លួន ស្របតាមក្របខណ្ឌច្បាប់ និងលិខិតបទដ្ឋានគតិយុត្តនានាជាធរមាន។

ចំពោះកិច្ចប្រជុំពិគ្រោះយោបល់នេះ លោក ប្រាក់ សុខុន រំពឹងថា នឹងរួមចំណែកលើកកម្ពស់ និងពង្រឹងកិច្ចសហប្រតិបត្តិការ រវាងរាជរដ្ឋាភិបាលកម្ពុជា និងអង្គការមិនមែនរដ្ឋាភិបាលបរទេស ឱ្យបានកាន់តែល្អប្រសើរថែមទៀត ដើម្បីបម្រើ និងការពារនូវឧត្តមប្រយោជន៍ជាតិ និងប្រជាជនកម្ពុជាយ៉ាងពិតប្រាកដ។ «វេទិកានេះ ក៏នឹងផ្តល់ឱកាស ឲ្យយើងរួមគ្នាកំណត់នូវបញ្ហាប្រឈមនានា និងស្វែងរកដំណោះស្រាយសមស្រប ដើម្បីពង្រឹងការអនុវត្តច្បាប់ និងបទបញ្ញត្តិជាធរមាន ឱ្យកាន់តែមានប្រសិទ្ធភាពសក្តិសមជានីតិរដ្ឋ»៕

អត្ថបទ៖ សោភា