រាជរដ្ឋាភិបាល សម្រេចកែសម្រួលរចនាសម្ព័ន្ធ និងប្រព័ន្ធគ្រប់គ្រងនៅថ្នាក់ក្រុង ស្រុកចំនួន ៧ចំណុច
- 2019-01-29 06:23:01
- ចំនួនមតិ 0 | ចំនួនចែករំលែក 0
រាជរដ្ឋាភិបាល សម្រេចកែសម្រួលរចនាសម្ព័ន្ធ និងប្រព័ន្ធគ្រប់គ្រងនៅថ្នាក់ក្រុង ស្រុកចំនួន ៧ចំណុច
ចន្លោះមិនឃើញ
សម្តេចនាយករដ្ឋមន្រ្តី ហ៊ុន សែន បានឯកភាពលើសំណើរបស់រដ្ឋមន្រ្តីក្រសួងមហាផ្ទៃ ក្នុងការកែសម្រួលរចនាសម្ព័ន្ធ និងប្រព័ន្ធគ្រប់គ្រងនៅថ្នាក់ក្រុង ស្រុក ចំនួន៧ចំណុច។
ក្នុងលិខិតស្នើសុំរបស់សម្តេច ស ខេង ចុះកាលពីថ្ងៃទី១៥ ខែមករា ឆ្នាំ២០១៩ និងត្រូវបានសម្តេច ហ៊ុន សែន ឯកភាពកាលពីថ្ងៃទី១១ ខែមករា ឆ្នាំ២០១៩ បានបង្ហាញពីចំណុចទាំង៧ ដូចខាងក្រោម៖
ទី១. លុបចោលការិយាល័យជំនាញរបស់ក្រសួង ស្ថាប័ននៅថ្នាក់ក្រុង ស្រុក ដោយធ្វើសមាហរណកម្មការិយាល័យជំនាញទាំងនេះទៅក្នុងរចនាសម្ព័ន្ធគ្រប់គ្រងរបស់រដ្ឋបាលក្រុង ស្រុក។
ទី២. ក្នុងការធ្វើសមាហរណកម្មការិយាល័យជំនាញនេះ រចនាសម្ព័ន្ធគ្រប់គ្រងថ្មីរបស់រដ្ឋបាលក្រុង ស្រុក ត្រូវបង្កើតជាអង្គភាព ឬការិយាល័យចង្កោមវិស័យសម្រាប់វិស័យមួយចំនួនដែលពាក់ព័ន្ធចង្កោមវិស័យសេដ្ឋកិច្ច និងចង្កោមវិស័យសង្គមកិច្ច ដើម្បីធានាដល់ការកាត់បន្ថយបន្ទុកចំណាយ និងពង្រឹងរចនាសម្ព័ន្ធស្ថាប័ន លើកលែងតែវិស័យជាអាទិភាពសំខាន់ៗមួយចំនួន ដូចជា អប់រំ សុខាភិបាល និងនគរូបនីយកម្ម ដែលចាំបាច់ត្រូវបង្កើតជាអង្គភាពដាច់ដោយឡែកៗពីគ្នា។
ទី៣. ការរៀបចំរចនាសម្ព័ន្ធគ្រប់គ្រងថ្មីនេះ ត្រូវមានភាពខុសគ្នារវាងរដ្ឋបាលក្រុង ដែលជាតំបន់ទីប្រជុំជន និងរដ្ឋបាលស្រុកដែលជាតំបន់ជនបទ។ ដោយឡែករចនាសម្ព័ន្ធគ្រប់គ្រងរបស់រដ្ឋបាលក្រុង ស្រុកនីមួយៗ ក៏ចាំបាច់ត្រូវរៀបចំផ្អែកលើវិសាលភាព និងសក្តានុពលជាក់ស្តែងរបស់រដ្ឋបាលនីមួយៗ។
ទី៤. ផ្ទេរមុខងារទាំងស្រុង ដែលកំពុងអនុវត្តដោយការិយាល័យជំនាញនានា របស់ក្រសួងស្ថាប័ននៅថ្នាក់ក្រុង ស្រុក នាពេលបច្ចុប្បន្ន និងមុខងារតាមវិស័យជាក់លាក់សមស្របផ្សេងទៀតទៅឱ្យរដ្ឋបាលក្រុង ស្រុក។ ទី៥. ផ្ទេរធនធានហិរញ្ញវត្ថុ ទ្រព្យសម្បត្តិ ដែលកំពុងប្រើប្រាស់សម្រាប់ការិយាល័យជំនាញនៅថ្នាក់ក្រុង ស្រុក និងធនធានហិរញ្ញវត្ថុ និងទ្រព្យសម្បត្តិចាំបាច់ផ្សេងទៀតរបស់ក្រសួង ស្ថាប័នទៅឱ្យរដ្ឋបាលក្រុង ស្រុក។
ទី៦. ផ្ទេរបុគ្គលិកដែលកំពុងបម្រើការងារនៅតាមការិយាល័យជំនាញ នៅថ្នាក់ក្រុង ស្រុក និងបុគ្គលិកចាំបាច់ផ្សេងទៀតរបស់ក្រសួង ស្ថាប័នទៅឱ្យរដ្ឋបាលក្រុង ស្រុក។
ទី៧. អង្គភាពមួយចំនួនដែលត្រូវរៀបចំថ្មីនៅថ្នាក់ក្រុង ស្រុក ត្រូវដំឡើងឋានៈឱ្យបានសមស្របទៅនឹងទំហំការងារ និងការទទួលខុសត្រូវក្នុងការផ្តល់សេវាដោយផ្ទាល់ជូនប្រជាពលរដ្ឋដើម្បីជំរុញលើកទឹកចិត្ត និងទាក់ទាញមន្ត្រីដែលមានសមត្ថភាព និងមានជំនាញខ្ពស់សមស្របស្ម័គ្រចិត្ត ទៅបម្រើការងារនៅរដ្ឋបាលក្រុង ស្រុក៕