២គ្រាប់ចុងម៉ោង ជួយឲ្យ Man Utd បន្តកំណត់ត្រា "មិនចាញ់" ក្រោមការដឹកនាំរបស់ Solskjaer
- 2019-01-30 01:24:58
- ចំនួនមតិ 0 | ចំនួនចែករំលែក 0
២គ្រាប់ចុងម៉ោង ជួយឲ្យ Man Utd បន្តកំណត់ត្រា "មិនចាញ់" ក្រោមការដឹកនាំរបស់ Solskjaer
ចន្លោះមិនឃើញ
១គ្រាប់របស់ Paul Pogba នៅនាទី ៨៧ និង១គ្រាប់ទៀតរបស់ Victor Lindelöf នៅនាទី ៩០+២ បានជួយសង្រ្គោះ Manchester United ឲ្យបាន ១ពិន្ទុ ក្នុងជំនួបសប្ដាហ៍ទី២៤ នៃ English Premier League ទល់នឹងក្រុម Burnley កាលពីយប់មិញនេះ។
នៅក្នុងការប្រកួតនេះ ក្រុមម្ចាស់ផ្ទះបិសាចក្រហម បានវាយសម្រុកយ៉ាងខ្លាំង ប៉ុន្តែក្រុមភ្ញៀវ Burnley ជាអ្នកអាចបំប៉ោងសំណាញ់ទីមុន ដល់ទៅ ២គ្រាប់ ដោយកីឡាករ Ashley Barnes (នាទី ៥១) និង Chris Wood (នាទី ៨១)។
អ្នកចាត់ការបណ្ដោះអាសន្នរបស់ Man Utd គឺលោក Ole Gunnar Solskjaer បាននិយាយក្រោយចប់ការប្រកួតថា៖ "ការវាយបកនេះ គឺពិតជាអស្ចារ្យ។ កីឡាកររបស់យើង បានឆ្លើយតបយ៉ាងល្អដូចការគ្រោងទុក នៅពេលគេស៊ីមុន ១-០ ឬ ២-០ ដូច្នេះខ្ញុំគិតថាការវាយបកនេះ ជារឿងដ៏អស្ចារ្យ។ យើងមានឱកាសច្រើន គ្រប់គ្រងបាល់ក៏ច្រើន ដូច្នេះយើងមិនសមក្លាយជាក្រុមដែលចាញ់ការប្រកួតនេះទេ"។
សូមបញ្ជាក់ថា លោក Solskjaer បានដឹកនាំ Man Utd បាន ៩ប្រកួតហើយ ដោយឈ្នះ ៨ប្រកួត និងស្មើ១ប្រកួត ដែលក្នុងនោះ មាន ៧ប្រកួតនៅក្នុងលីគ (ឈ្នះ ៦ ស្មើ១)។ យ៉ាងណាក្ដី បិសាចក្រហម នៅតែបន្តឈរលេខ ៦ ដដែល តាមពីក្រោយក្រុមលេខ ៥ Arsenal ចំនួន ២ពិន្ទុ។
លទ្ធផលនៅ Premier League ទាំងអស់ កាលពីយប់មិញ រួមមាន៖
Arsenal ២-១ Cardiff
Fulham ៤-២ Brighton
Huddersfield ០-១ Everton
Wolves ៣-០ West Ham
Newcastle ២-១ Man City
ទស្សនាវីដេអូហាយឡាយខាងក្រោមនេះ៖