កូរ៉េខាងត្បូង បង្ហាញយន្តហោះផ្ទុកសាំងទី១ ដែលប្រើសម្រាប់ឱ្យយន្តហោះចម្បាំង ចាក់សាំងលើអាកាស

2019-01-30 03:45:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កងទ័ពអាកាសកូរ៉េខាងត្បូង នៅថ្ងៃទី៣០ ខែមករា ឆ្នាំ២០១៩ បានធ្វើពិធីបង្ហាញយន្តហោះ KC-330 ដែលជាយន្តហោះផ្ទុកសាំងទីមួយរបស់ខ្លួន ហើយគ្រោងដាក់ឱ្យប្រតិបត្តិការនៅឆ្នាំ២០២០។ នេះជាយន្តហោះមួយក្នុងចំណោម ៤គ្រឿង ដែលកូរ៉េខាងត្បូងបញ្ជាទិញពីក្រុមហ៊ុន Airbus។

លោក Jeong Kyeong-doo រដ្ឋមន្រ្តីក្រសួងការពារជាតិកូរ៉េខាងត្បូង បានថ្លែងក្នុងពិធីនេះថា យន្តហោះផ្ទុកសាំងនេះ នឹងពង្រឹងបន្ថែមនូវសមត្ថភាពយោធារបស់កូរ៉េខាងត្បូង ក្នុងការឆ្លើយតបទៅនឹងការគំរាមនានាពីគ្រប់ទិសដៅទាំងអស់ ក្រោមស្ថានភាពសន្តិសុខដែលមានការប្រែប្រួលបែបនេះ។

មេបញ្ជាការមួយរូបក្នុងកងទ័ពអាកាសកូរ៉េខាងត្បូង លោក Lee Wang-keun បាននិយាយថា តាមរយៈយន្តហោះផ្ទុកសាំងនេះ យន្តហោះចម្បាំងជាច្រើន នឹងអាចពន្យារប្រតិបត្តិការរបស់វាបានកាន់តែឆ្ងាយ និងកាន់តែយូរ នៅតំបន់កោះដែលមានជម្លោះជាមួយប្រទេសជិតខាងដូចជា កោះ Dokdo និង Leodoជាដើម។ យន្តហោះ KC-330 ក៏នឹងចូលរួមចំណែកយ៉ាងសំខាន់ ក្នុងការការពារតំបន់កំណត់អត្តសញ្ញាណដែនអាកាសរបស់កូរ៉េខាងត្បូងផងដែរ។

សូមជម្រាបថា ក្រុងសេអ៊ូល បានចុះកិច្ចសន្យាទិញយន្តហោះ KC-330 ចំនួន៤គ្រឿងជាមួយក្រុមហ៊ុន Airbus កាលពីឆ្នាំ២០១៥។ យន្តហោះទី១ខាងលើនេះ ត្រូវបានបញ្ជូនទៅដល់កូរ៉េខាងត្បូង កាលពីខែវិច្ឆិកា ឆ្នាំ២០១៨។ ដោយឡែកយន្តហោះទី២ នឹងត្រូវបញ្ជូនទៅដល់ក្នុងខែមេសា, ទី៣ ក្នុងខែសីហា និងទី៤ចុងក្រោយ នៅធ្នូ ដែលយន្តហោះទាំង៤គ្រឿងនេះ នឹងត្រូវដាក់ចូលក្នុងជួរកងទ័ពអាកាសកូរ៉េខាងត្បូង ចាប់ពីខែកក្កដា ឆ្នាំ២០២០។

យន្តហោះ KC-330 អាចផ្ទុកសាំងសម្រាប់ឱ្យយន្តហោះចម្បាំង F-15K ចាក់បាន១០គ្រឿង ឬយន្តហោះ KF-16 បានដល់២០គ្រឿង។ យន្តហោះនេះ អាចផ្ទុកមនុស្សបាន ៣០០នាក់ និងទំនិញ ៤៧តោនផងដែរ៕

ប្រភព៖ Yonhapnews ប្រែសម្រួល៖ សំភី