ក្រសួងទេសចរណ៍ ដាក់ចេញយុទ្ធសាស្ត្រ ៤ចំណុច ជំរុញកំណើនទេសចរចិនមកកម្ពុជា
- 2019-01-30 06:11:52
- ចំនួនមតិ 0 | ចំនួនចែករំលែក 0
ក្រសួងទេសចរណ៍ ដាក់ចេញយុទ្ធសាស្ត្រ ៤ចំណុច ជំរុញកំណើនទេសចរចិនមកកម្ពុជា
ចន្លោះមិនឃើញ
ក្រសួងទេសចរណ៍កម្ពុជា បានដាក់ចេញនូវយុទ្ធសាស្ត្រចំនួន ៤ចំណុច ដើម្បីទាក់ទាញភ្ញៀវទេសចរបរទេស ពិសេសទេសចរចិន មកកម្ពុជា ក្នុងកិច្ចពិភាក្សាមួយដឹកនាំដោយលោក ថោង ខុន រដ្ឋមន្ត្រីក្រសួងទេសចរណ៍កម្ពុជា និងលោក ឡ ស៊ូកាង រដ្ឋមន្ត្រីក្រសួងវប្បធម៌និងទេសចរណ៍ចិន នៅទីស្ដីការក្រសួង កាលពីថ្ងៃទី២៩ ខែមករា ឆ្នាំ២០១៩។
១- បង្កើតផលិតផលទេសចរណ៍ថ្មីប្រកបដោយការច្នៃប្រឌិត និងនវានុវត្តន៍ តាមរយៈការទាក់ទាញការវិនិយោគលើវិស័យទេសចរណ៍។
២- ពង្រឹងគុណភាពផលិតផល និងសេវាកម្មទេសចរណ៍ តាមរយៈយុទ្ធនាការ «សេវាមួយ ស្តង់ដារមួយ» និង «បុគ្គលិកម្នាក់ ជំនាញមួយ»។
៣- ពង្រឹងការឃោសនាផ្សព្វផ្សាយទេសចរណ៍ឲ្យកាន់តែខ្លាំងតាមរបៀប Traditional Marketing, Digital Marketing, E-Marketing ។
៤- ការគ្រប់គ្រងឧស្សាហកម្មទេសចរណ៍តាមប្រព័ន្ធអនឡាញ (Smart Tourism)។
សូមរំឭកថា ក្រសួងទេសចរណ៍បានដាក់ចេញនូវយុទ្ធសាស្រ្តទីផ្សារទេសចរណ៍ចិន និងអនុវត្តសៀវភៅស្ដីពី China Ready ដោយផ្តោតលើ ៤ចំណុចសំខាន់ៗ៖ ការសម្រួលការធ្វើដំណើរ ការបញ្ជ្រាបការយល់ដឹងជាសាធារណៈអំពីទីផ្សារចិនដល់ភាគីពាក់ព័ន្ធ ការពង្រឹងគុណភាពឧស្សាហកម្មទេសចរណ៍តាមរយៈការអនុវត្តប្រព័ន្ធបញ្ជាក់គុណភាព (China Ready Accreditation System) ដល់សេវាកម្មទេសចរណ៍ និងយន្តការគាំទ្រគម្រោងបង្កើត China Ready Center នៅកម្ពុជា។
ចំនួនទេសចរអន្តរជាតិ ពិសេសទេសចរចិនមកទស្សនាកម្ពុជា នាប៉ុន្មានឆ្នាំចុងក្រោយនេះ មានការកើនឡើងគួរឲ្យកត់សម្គាល់៖
ឆ្នាំ២០១៧ ទេសចរអន្តរជាតិសរុបមកទស្សនាកម្ពុជាមាន ៥,៦លាននាក់ កើនឡើង ១១,៨% ក្នុងនោះទេសចរចិនមានចំនួនជាង ១,២លាននាក់ (២១,៦% នៃចំនួនទេសចរសរុប) កើនឡើង ៤៥,៩%។
ឆ្នាំ២០១៨ ទេសចរអន្តរជាតិសរុបមកទស្សនាកម្ពុជាមានប្រមាណ ៦,២លាននាក់ កើនឡើងប្រមាណ ១១% ក្នុងនោះទេសចរចិនមានប្រមាណ ២លាននាក់ (៣០,៦% នៃចំនួនទេសចរសរុប) កើនឡើង ៧០%។
ទេសចរចិនមកកម្ពុជា ស្ថិតក្នុងលំដាប់លេខ១ ក្នុងឆ្នាំ២០១៧ និងឆ្នាំ២០១៨ ក្នុងចំណោមទីផ្សារធំៗទាំង១០៕