រដ្ឋបាលពូទីន ឆ្លើយតបនឹងការផ្សាយរឿងដឹកមាស២០តោនពីវេណេហ្ស៊ុយអេឡាទៅរុស្ស៊ី

2019-01-31 03:17:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋបាលលោកប្រធានាធិបតីរុស្ស៊ី វ៉្លាឌឺមៀ ពូទីន បានធ្វើការឆ្លើយតប និងចាត់ទុករបាយការណ៍ដែលចុះផ្សាយថា រុស្ស៊ីបានដឹកមាស ២០តោនដែលមានតម្លៃស្មើនឹង ៨៤០លានដុល្លារអាមេរិកតាមយន្តហោះពីប្រទេសវេណេហ្ស៊ុយអេឡា មកទុកនៅប្រទេសខ្លួន គឺជាព័ត៌មានមិនពិត។ នេះបើយោងតាមការលើកឡើងរបស់អ្នកនាំពាក្យវិមានក្រឹមឡាង លោក Dmitry Peskov ។

លោក ពូទីន និងលោក Maduro ប្រធានាធិបតីវេណេហ្ស៊ុយអេឡា (រូបថត៖ Sputnik)

បណ្ដាញសារព័ត៌មាននានានៅលោកខាងលិច បានចុះផ្សាយថា រុស្ស៊ី បានយកយន្តហោះដ៏ធំមួយគ្រឿង មកដឹកមាសទម្ងន់ ២០តោនពីវេណេហ្ស៊ុយអេឡាទៅកាន់ក្រុងម៉ូស្គូ ដោយយន្តហោះបានមកដល់ព្រលានយន្តហោះអន្តរជាតិប្រទេសវេណេហ្ស៊ុយអេឡា កាលពីព្រឹកថ្ងៃទី៣០ ខែមករា ឆ្នាំ២០១៩។ មាសទាំងនោះ ត្រូវបានរាយការណ៍ថា បានយកចេញពីធនាគារជាតិ នៃប្រទេសវេណេហ្ស៊ុយអេឡា។

របាយការណ៍បានដកស្រង់ចេញពីការអះអាងរបស់លោក Jose Guerra មេធាវីវេណេហ្ស៊ុយអេឡាមួយរូប។ ក៏ប៉ុន្តែ លោកមិនបានផ្ដល់ភស្តុតាងបញ្ជាក់ ចំពោះវត្តមានយន្តហោះប៊ូអ៊ីញ 777 ដែលលោកអះអាងថា បានចុះចតនៅរដ្ឋធានី Caracas នោះទេ។

ចំណែកសារព័ត៌មាន Noticias នៅវេណេហ្ស៊ុយអេឡា បានបង្ហោះរូបថតមួយសន្លឹក បង្ហាញពីយន្តហោះក្រុមហ៊ុនអាកាសចរណ៍ Nordwind មកពីក្រុងមូស្គូ បានទៅដល់ព្រលានយន្តហោះអន្តរជាតិវេណេហ្ស៊ុយអេឡា។

សារព័ត៌មាន Noticias នៅវេណេហ្ស៊ុយអេឡា បានបង្ហោះរូបថតមួយសន្លឹក បង្ហាញពីយន្តហោះក្រុមហ៊ុនអាកាសចរណ៍ Nordwind មកពីក្រុងមូស្គូ បានទៅដល់ព្រលានយន្តហោះអន្តរជាតិវេណេហ្ស៊ុយអេឡា

លោក Simon Zerpa រដ្ឋមន្ត្រីហិរញ្ញវត្ថុវេណេហ្ស៊ុយអេឡា មិនបានឆ្លើយជុំវិញរឿងមាសទាំងនោះទេ ហើយបដិសេធថា មិនមានយន្តហោះរុស្ស៊ី ចុះចតនៅព្រលានដូចការលើកឡើងខាងលើទេ នៅពេលសួរដោយសារព័ត៌មាន Bloomberg ។

អ្នកនាំពាក្យរបស់លោក ពូទីន បានសង្កត់ធ្ងន់ថា រុស្ស៊ីបានត្រៀមខ្លួនរួចជាស្រេច ក្នុងការចូលរួមដោះស្រាយវិបត្តិនយោបាយ នៅវេណេហ្ស៊ុយអេឡា ដោយមិនជ្រៀតជ្រែកផ្ទៃក្នុងប្រទេសមួយនេះ។

លោក Dmitry Peskov និងលោក ពូទីន (រូបថត៖ Russia Insider)

គួរបញ្ជាក់ថា ប្រទេសនៅទ្វីបអាមេរិកខាងត្បូងនេះ បានធ្លាក់ក្នុងវិបត្តិ ក្រោយមេដឹកនាំគណបក្សប្រឆាំងលោក Juan Guaido ប្រកាសខ្លួនជាប្រធានាធិបតីស្របច្បាប់។ សហរដ្ឋអាមេរិក និងប្រទេសមួយចំនួននៅលោកខាងលិច បានប្រកាសទទួលស្គាល់លោក Guaido។ ផ្ទុយទៅវិញ រុស្ស៊ី តួកគី អ៊ីរ៉ង់ និងចិន ប្រកាសគាំទ្រលោកប្រធានាធិបតី Nicolas Maduro ដែលបានឡើងស្បថចូលកាន់តំណែងប្រធានាធិបតីអាណត្តិទី២របស់ខ្លួន កាលពីដើមឆ្នាំ២០១៩។

ថ្មីៗនេះ ប្រទេសអង់គ្លេស បានបង្កកមាសរបស់លោក Maduro តម្លៃ ១២០០លានដុលា្លរតាមសំណើរបស់អាមេរិក ដើម្បីយកមកប្រើប្រាស់ក្នុងរដ្ឋាភិបាលថ្មី ស្របច្បាប់៕

ប្រភព៖ RT | Foxnews ប្រែសម្រួល៖ លាភ.