ទូតនៅថៃ អំពាវនាវឲ្យពលរដ្ឋខ្មែរ ប្រុងប្រយ័ត្ន និងពាក់ម៉ាសការពារ
- 2019-02-01 01:51:31
- ចំនួនមតិ 0 | ចំនួនចែករំលែក 0
ទូតនៅថៃ អំពាវនាវឲ្យពលរដ្ឋខ្មែរ ប្រុងប្រយ័ត្ន និងពាក់ម៉ាសការពារ
ចន្លោះមិនឃើញ
ស្ថានឯកអគ្គរាជទូតកម្ពុជាប្រចាំប្រទេសថៃ បានអំពាវនាវឲ្យប្រជាពលរដ្ឋខ្មែរដែលមានវត្តមាននៅក្នុងប្រទេសថៃទាំងអស់ មេត្តាថែរក្សាសុខភាព និងមានការប្រុងប្រយ័ត្នខ្ពស់ដោយពាក់ម៉ាសការពារប្រភេទ N95 ដោយសារបញ្ហាខ្យល់កខ្វក់។ នេះបើយោងតាមសេចក្ដីជូនដំណឹង ចុះកាលពីថ្ងៃទី៣១ ខែមករា ឆ្នាំ២០១៩។
ស្ថានឯកអគ្គរាជទូតកម្ពុជាប្រចាំប្រទេសថៃ បានឲ្យដឹងថា ដោយសារឥទ្ធិពលខ្យល់កខ្វក់ PM2.5 នៅតំបន់មួយចំនួននៅប្រទេសថៃ មានការកើនឡើងជាលំដាប់ដែលបណ្ដាលឲ្យប៉ះពាល់ដល់សុខភាព ខ្យល់កខ្វក់នៅក្រុងបាងកក និងខេត្តជាច្រើន ដូចជា ខេត្តសាមុទ្រប្រាកាន ខេត្តសមុទ្រសាខន ខេត្តនន្ទបុរី ខេត្តណាខនប៉ាធុម ជាដើម បានធ្លាក់ចុះខ្លាំងដល់កម្រិតគ្រោះថ្នាក់។
ប្រភពបន្តថា បញ្ហានេះ បង្កដោយកម្ទេចធូលីជាច្រើនដែលគេស្គាល់ឈ្មោះថា PM2.5 មានភាគល្អិតនៃធូលីមានទំហំតូចជាង ២,៥ មីក្រូម៉ែត្រ ហើយត្រូវបានចាត់ទុកថា មានគ្រោះថ្នាក់បំផុតដោយសារទំហំដ៏តូចរបស់វា អាចចូលជ្រៅទៅក្នុងសួត និងប៉ះពាល់សរីរាង្គផ្សេងទៀត។
ស្ថានឯកអគ្គរាជទូតកម្ពុជាប្រចាំប្រទេសថៃបន្ថែមថា ទាក់ទងនឹងបញ្ហានេះ រាជរដ្ឋាភិបាលប្រទេសថៃ បានប្រកាសឲ្យសាលារៀន និងគ្រឹះស្ថានអប់រំមួយចំនួន បិទដំណើរការជាបណ្ដោះអាសន្ន ក្នុងគោលបំណងការពារសុវត្ថិភាពសុខភាពរបស់សិស្សនិស្សិតទាំងអស់៕