កម្ពុជា ទទួលបានថវិកា ១៧លានដុល្លារពីអាមេរិក លើគម្រោងអភិវឌ្ឍន៍វារីវប្បកម្មក្នុងខេត្តចំនួន៦

2019-02-01 02:49:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

តាមរយៈគម្រោងអភិវឌ្ឍន៍វារីវប្បកម្មសម្រាប់និរន្តភាពពាណិជ្ជកម្ម (CAST) ប្រទេសកម្ពុជា ទទួលបានការគាំទ្រនូវថវិកាចំនួនជាង ១៧លានដុល្លារពីរដ្ឋាភិបាលអាមេរិក ដើម្បីបង្កើន និងអភិវឌ្ឍវារីវប្បកម្មទឹកសាបនៅកម្ពុជា នៅក្នុងខេត្តចំនួន៦រួមមាន៖ ខេត្តកណ្តាល កំពង់ធំ សៀមរាប បាត់ដំបង ពោធិ៍សាត់ និងកំពង់ចាម។

សូមជម្រាបថា ពិធីប្រកាសបើកគម្រោង CAST នេះ ធ្វើឡើងកាលពីថ្ងៃទី៣១ ខែមករា ឆ្នាំ២០១៩ នៅសណ្ឋាគារកាំបូឌីយ៉ាណា ក្រោមអធិបតីភាព លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងលោក Michael Newbill តំណាងស្ថានទូតអាមេរិកប្រចាំនៅកម្ពុជា និងមានការអញ្ជើញចូលរួមដោយលោកស្រី Megan Francic តំណាងក្រសួងកសិកម្មសហរដ្ឋអាមេរិក លោក Jim Hershey នាយកគម្រោង CAST នៅកម្ពុជា តំណាងអង្គការ សង្គមស៊ីវិល និងថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ សរុបប្រមាណ ៧០នាក់។

លោក វេង សាខុន និងលោក Michael Newbill ក្នុងពិធីប្រកាសបើកគម្រោង CAST កាលពីថ្ងៃទី៣១ មករា ២០១៩

ក្រសួងកសិកម្ម បានឱ្យដឹងថា គម្រោងនេះ ត្រូវបានផ្តល់ឥណទានដោយផ្ទាល់ពីក្រសួងកសិកម្មសហរដ្ឋអាមេរិក សម្រាប់ដំណើរការកម្មវិធី ស្របទៅនឹងផែនការយុទ្ធសាស្រ្តអភិវឌ្ឍន៍វារីវប្បកម្មនៃរាជរដ្ឋាភិបាលកម្ពុជា។ គម្រោងនេះ នឹងជួយជំរុញដល់កំណើនកូនត្រីពូជ និងចំណី ព្រមទាំងពង្រឹងគ្រប់ទំនាក់ទំនងក្នុងខ្សែច្រវាក់តម្លៃ ពីកន្លែងបង្កាត់ភ្ញាស់ទៅអ្នកផលិត អ្នកទិញ និងអ្នកចែកចាយ។

ក្រសួងបញ្ជាក់ថា កម្ពុជានឹងទទួលបានផលប្រយោជន៍ពីការកើនឡើងនូវទំនុកចិត្ត និងឈានទៅទទួលបាននូវផលត្រីដែលមានគុណភាពខ្ពស់ និងស្តង់ដារសមរម្យ។ លើសពីនេះ គម្រោង CAST នឹងជួយសេដ្ឋកិច្ចជាតិកម្ពុជា តាមរយៈការនាំចេញផលត្រីទៅកាន់ទីផ្សារអន្តរជាតិ និងផ្គត់ផ្គង់ទីផ្សារក្នុងស្រុកប្រកបដោយគុណភាព។

ថ្លែងក្នុងពិធីនេះ លោក Michael Newbill បានបញ្ជាក់ថា គម្រោង (CAST) ជាគម្រោងដ៏សារៈសំខាន់ក្នុងការចូលរួមអភិវឌ្ឍអនុវិស័យជលផលនៅកម្ពុជា ជាពិសេសលើការអភិវឌ្ឍបច្ចេកទេស និងបច្ចេកវិទ្យាវារីវប្បកម្ម ដើម្បីធានានូវនិរន្តភាពផលិតផលជលផលនៅកម្ពុជា និងបង្កើននូវគុណភាព និងស្តង់ដារផលិតផលត្រី។ លើសពីនេះ គម្រោង CAST ក៏នឹងជួយដល់ការផ្សារភ្ជាប់ទំនាក់ទំនងពាណិជ្ជកម្មរវាងកម្ពុជា និងសហរដ្ឋអាមេរិកផងដែរ។

លោក Michael Newbill ថ្លែងក្នុងពិធីប្រកាសបើកគម្រោង CAST

ជាមួយគ្នានេះ លោករដ្ឋមន្រ្តី វេង សាខុន បានលើកឡើងថា តាមរយៈគម្រោងនេះ បានបង្ហាញពីជំហរ របស់សហរដ្ឋអាមេរិកក្នុងការគាំទ្រដល់គោលនយោបាយដឹកនាំរបស់រាជរដ្ឋាភិបាលកម្ពុជា។

លោកបានបញ្ជាក់បន្ថែមថា វិស័យវារីវប្បកម្មនៅកម្ពុជា កំពុងផ្តល់នូវសញ្ញានៃការរីកចម្រើនគួរឱ្យកត់សម្គាល់។ ដោយឡែកវិស័យនេះ ក៏មានការប្រឈមជាច្រើនដូចជា គុណភាពកូនត្រីពូជមិនទាន់ឆ្លើយតបតាមតម្រូវការ កង្វះខាតនូវការទទួលបានបច្ចេកទេស និងបច្ចេកវិទ្យាថ្មីៗ តម្រូវការអនាម័យ និងស្តង់ដារភូតគាមអនាម័យ និងស្ថានភាពទីផ្សារដែលភ្ជាប់រវាងទីផ្សារក្នុងស្រុក និងអន្តរជាតិក៏នៅមានកម្រិត។

លោក វេង សាខុន ថ្លែងក្នុងពិធីប្រកាសបើកគម្រោង CAST

គម្រោង CAST Cambodia នេះពិតជាចាំបាច់ និងឆ្លើយតបទាន់ពេលវេលា ដើម្បីសម្រេចបានតាមគោលដៅនៃការសម្របសម្រួលផ្គត់ផ្គង់ត្រីបានទាំងបរិមាណ មានគុណភាពខ្ពស់ និងតម្លៃល្អប្រសើរនៅប្រទេសកម្ពុជា ក្នុងបរិបទនៃសាកលភាវូបនីយកម្ម។ នេះជាការលើកឡើងបន្ថែមរបស់លោករដ្ឋមន្រ្តីក្រសួងកសិកម្ម៕

អត្ថបទ៖ សំភី