អាជ្ញាធរខេត្តកំពត ចង់ឱ្យមានទំនប់ស្ទាក់ទឹកដែលហូរចុះពីភ្នំកំចាយ

2019-02-07 08:53:38
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អាជ្ញាធរខេត្តកំពត ចង់ឱ្យមានទំនប់ស្ទាក់ទឹក ដែលហូរចុះពីអាងវារីអគ្គិសនីកំចាយ ដើម្បីរក្សាទុកប្រើប្រាស់ពេញមួយឆ្នាំៗ។ រដ្ឋបាលខេត្ត នឹងពិភាក្សាជាមួយថ្នាក់ដឹកនាំក្រសួងជំនាញក្នុងការបង្កើតសមិទ្ធផលចាំបាច់នេះ ដើម្បីគ្រប់គ្រងទឹកប្រកបដោយនិរន្តរភាព។ នេះបើតាមការចុះផ្សាយរបស់ក្រសួងព័ត៌មាន កាលពីថ្ងៃទី៦ ខែកុម្ភៈ ឆ្នាំ២០១៩។

ថ្លែងក្នុងកិច្ចប្រជុំនៅសាលាខេត្តស្តីពីការត្រៀមគ្រប់គ្រង និងឆ្លើយតបហានិភ័យផ្សេងៗ លោក ជាវ តាយ អភិបាលខេត្តកំពត បានមានប្រសសាន៍ថា មន្ទីរធនធានទឹកខេត្ត ត្រូវកំណត់គោលដៅឱ្យច្បាស់លាស់ ដើម្បីរក្សាទឹកសម្រាប់ប្រើប្រាស់បានគ្រប់គ្រាន់។

លោក ជាវ តាយ ក្នុងកិច្ចប្រជុំស្តីពីការត្រៀមគ្រប់គ្រង និងឆ្លើយតបហានិភ័យផ្សេងៗ (រូបថត៖ ក្រសួងព័ត៌មាន)

លោកឱ្យដឹងថា សព្វថ្ងៃ នៅខេត្តកំពតមានរោងចក្រចម្រាញ់ទឹកស្អាតពីរ ដែលទទួលទឹកដោយការបង្ហូរចុះពីអាងទំនប់វារីអគ្គិសនីកំចាយ ក្នុងសកម្មភាពផលិតអគ្គិសនី។ រោងចក្រទាំងពីរនេះ អាចផលិតទឹកស្អាតបាន ១៣ ៥០០ម៉ែត្រត្រីគុណក្នុងមួយថ្ងៃ។ ដូច្នេះបើក្នុងអាងទំនប់ ពុំមានទឹកទេនោះ ទឹកស្អាតដែលបានមកពីការចម្រាញ់របស់រោងចក្រទាំងពីរក៏គ្មានដែរ។

អភិបាលខេត្តរូបនេះ លើកឡើងថា៖ «បើក្នុងមួយថ្ងៃ រោងចក្រវារីអគ្គិសនីដំណើរការបង្ហូរទឹកពេញ២៤ម៉ោងនោះ នឹងត្រូវប្រើទឹកអស់ ១៥លានម៉ែត្រត្រីគុណ។ ម្ល៉ោះហើយតាមបរិមាណទឹកដែលមានក្នុងអាងទំនប់ទាំងប៉ុន្មាន គឺបង្ហូរត្រឹម១៨ថ្ងៃនឹងត្រូវអស់តែម្តង។ ប៉ុន្តែ សព្វថ្ងៃនេះ ក្រុមហ៊ុនប្រើតែបីម៉ោងប៉ុណ្ណោះ ក្នុងមួយថ្ងៃដើម្បីសន្សំសំចៃទឹកទុក»។

លោក ជាវ តាយ បានបង្ហាញការសោកស្តាយ ដែលសព្វថ្ងៃ មិនមានទំនប់ស្ទាក់ទឹកធ្លាក់មកពីភ្នំកំចាយ ទុកសម្រាប់ប្រើប្រាស់នៅពេលជួបភាពរាំងស្ងួត ព្រោះខ្វះផ្នែកបច្ចេកទេស ហើយក៏ហួសពីដែនសមត្ថកិច្ចរបស់ខេត្តដែរ៕

អត្ថបទ៖ សំភី