លោក ជា សុផារ៉ា ណែនាំឱ្យរៀបចំថ្មក្រានីតលើចិញ្ចើមផ្លូវនៅមុខអគារ និងដីឡូត៍ ក្នុងខេត្តព្រះសីហនុ

2019-02-08 02:10:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងដែនដី នគរូបនីយកម្ម និងសំណង់ បានណែនាំដល់ម្ចាស់សណ្ឋាគារ ភោជនីយដ្ឋាន អគារការិយាល័យ អគារស្នាក់នៅ សំណង់ និងម្ចាស់កម្មសិទ្ធិដីឡូត៍ ដែលកំពុងសាងសង់ ឬបានសាងសង់រួច ត្រូវ៖

-រៀបចំចិញ្ចើមផ្លូវនៅមុខដីឡូត៍ ឬអចលនវត្ថុរបស់ខ្លួន ដោយក្រាលថ្មក្រានីត ដែលមាននីវ៉ូគោលស្មើគ្នាតែមួយ ដោយរៀបចំឱ្យមានផ្លូវថ្មើរជើង និងគន្លងផ្លូវទោចក្រយាន សម្រាប់សាធារណជន និងជនពិការ អាចធ្វើចរាចរណ៍បានប្រកបដោយសមធម៌។

-យកចិត្តទុកដាក់ខ្ពស់អំពីការធ្វើសមាហរណកម្ម និងការតភ្ជាប់ពីផ្លូវមួយទៅផ្លូវមួយ ស្របតាមបទដ្ឋានបច្ចេកទេសហេដ្ឋារចនាសម្ព័ន្ធផ្លូវថ្នល់ និងទីតាំងភូមិសាស្រ្ត។

-រក្សាសុវត្ថិភាព សណ្តាប់ធ្នាប់ អនាម័យ សោភ័ណភាព បរិស្ថានល្អ និងសុខដុមរមនាជាមួយនឹងអ្នកជិតខាង និងសាធារណជន។

ការណែនាំខាងលើនេះ ធ្វើឡើងក្នុងលិខិតមួយដែលលោក ជា សុផារ៉ា ផ្ញើទៅកាន់អភិបាល និងប្រធានគណៈកម្មាធិការរៀបចំដែនដី និងនគរូបនីយកម្មខេត្តព្រះសីហនុ កាលពីថ្ងៃទី៦ ខែកុម្ភៈ ឆ្នាំ២០១៩។ គោលបំណងគឺដើម្បីធានាបាននូវសោភ័ណភាពសាធារណៈ ទាក់ទាញភ្ញៀវទេសចរ និងលើកកម្ពស់ការធ្វើដំណើរដោយថ្មើរជើងប្រកបដោយសុខសុវត្ថិភាព សុខុមាលភាព និងភាពងាយស្រួលដល់សាធារណជន៕