កម្ពុជា-ឥណ្ឌូណេស៊ី នឹងតភ្ជាប់ការហោះហើរត្រង់ឡើងវិញ ក្រោយខកខានជិត ៥០ឆ្នាំ
- 2019-02-08 07:10:32
- ចំនួនមតិ 0 | ចំនួនចែករំលែក 0
កម្ពុជា-ឥណ្ឌូណេស៊ី នឹងតភ្ជាប់ការហោះហើរត្រង់ឡើងវិញ ក្រោយខកខានជិត ៥០ឆ្នាំ
ចន្លោះមិនឃើញ
ក្រសួងទេសចរណ៍បានឱ្យដឹងថា កម្ពុជា-ឥណ្ឌូណេស៊ី បាននឹងកំពុងជំរុញឲ្យមានការហោះហើរត្រង់ឡើងវិញ បន្ទាប់ពីខកខាននៃការហោះហើរត្រង់អស់ជិតកន្លះសតវត្សរ៍ ពោលគឺចាប់ពីក្រោយឆ្នាំ១៩៧០មក។ បើតាមរដ្ឋមន្ត្រីក្រសួងទេសចរណ៍ លោក ថោង ខុន ការហោះហើរត្រង់នេះ នឹងចាប់ផ្ដើមឡើងក្នុងពេលឆាប់ៗខាងមុខ ក្នុងឆ្នាំ២០១៩នេះ។
ក្នុងជំនួបរវាងលោក ថោង ខុន ជាមួយលោក ស៊ូឌីម៉ាន់ ហាសេង ឯកអគ្គរដ្ឋទូតឥណ្ឌូណេស៊ីប្រចាំកម្ពុជា ដែលបានដឹកនាំប្រតិភូនៃក្រុមហ៊ុនអាកាសចរណ៍ឥណ្ឌូណេស៊ី CITILINK នៅទីស្ដីការក្រសួងទេសចរណ៍ កាលពីព្រឹកថ្ងៃទី៧ ខែកុម្ភៈ ឆ្នាំ២០១៩ ភាគីឥណ្ឌូណេស៊ីបានសម្រេចថា នឹងបើកឲ្យមានការហោះហើរឡើងវិញ អាចនៅក្នុងឆមាសទី២ ក្នុងពេលដ៏ខ្លីខាងមុខនេះ។
លោករដ្ឋមន្ត្រីបានបន្តថា នៅពេលដែលមានការហោះហើរត្រង់ពីឥណ្ឌូណេស៊ី មកកាន់កម្ពុជាឡើងវិញ នោះនឹងនាំមកនូវភ្ញៀវទេសចរច្រើនឡើងបន្ថែមទៀត ជាពិសេសទេសចរឥណ្ឌូណេស៊ី ខណៈដែលបច្ចុប្បន្ន មានត្រឹមតែជាង ៥ម៉ឺននាក់ក្នុងមួយឆ្នាំតែប៉ុណ្ណោះ។
លោកឯកអគ្គរដ្ឋទូតលើកឡើងថា កម្ពុជា-ឥណ្ឌូណេស៊ី ចាំបាច់ត្រូវមានកិច្ចសហការនៅលើគ្រប់វិស័យ ក្នុងនោះក៏មានវិស័យទេសចរណ៍ផងដែរ ដូច្នេះការបើកឲ្យមានការហោះហើរត្រង់ឡើងវិញរវាងប្រទេសទាំងពីរ គឺជារឿងចាំបាច់៕