សម្តេច ហ៊ុន សែន៖ ជីវិតយុវជនរបស់ខ្ញុំ គ្មានស្គាល់សេចក្តីសុខ និងសប្បាយទេ

2019-02-10 03:40:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានឱ្យដឹងថា ក្នុងជីវិតយុវជនរបស់សម្តេច គឺគ្មានស្គាល់អ្វីដែលហៅថា សេចក្តីសុខ និងសប្បាយទេ សូម្បីតែការសិក្សាក៏មិនបានពេញលេញដែរ។ នេះបើតាមការបង្ហោះនៅលើទំព័រហ្វេសប៊ុករបស់សម្តេច ហ៊ុន សែន នាព្រឹកថ្ងៃទី១០ ខែកុម្ភៈ ឆ្នាំ២០១៩។

សម្តេចនាយករដ្ឋមន្រ្តី បានរៀបរាប់យ៉ាងដូច្នេះថា៖ «ខ្ញុំបានចូលធ្វើទាហានតាំងពីអាយុ១៨ឆ្នាំ ដើម្បីវាយពួកប៉ុលពត ត្រូវរបួសពេញខ្លួន និងពិការភ្នែកម្ខាងមកទល់សព្វថ្ងៃទៀតផង។ យើងឆ្អែតហើយសង្រ្គាម និងការនិរាសព្រាត់ប្រាស់។ ពេលនេះយើងជ្រើសរើស “សន្តិភាព” ជាធំលើសអ្វីៗទាំងអស់ ព្រោះគឺជាដង្ហើមនៃជីវិត»។

ក្នុងការបង្ហោះនៅលើហ្វេសប៊ុកនោះ គឺមានរូបថតរបស់សម្តេច ហ៊ុន សែន និងយុវជន និងយុវនារីខ្មែរផ្សេងទៀត ក្នុងសម័យសង្គ្រាម ដោយសម្តេចលើកឡើងថា ជាសង្គ្រាមដែលបានកើតឡើងកន្លងមក គឺបណ្តាលមកពីការអុជអាល ញុះញុង អូសទាញ លាបពណ៌ និងជ្រៀតជ្រែកពីបរទេស និងពីក្រុមអគតិមួយចំនួន។

ជាមួយគ្នានេះ ប្រមុខរាជរដ្ឋាភិបាល ក៏បានអំពាវនាវឱ្យនាំគ្នាថែរក្សា និងការពារសន្តិភាពឱ្យបានរឹងមាំល្អ ដើម្បីប្រទេសជាតិកាន់តែរីកចម្រើន ហើយអនាគតយុវជន យុវនារី ក៏កាន់តែមានឱកាសល្អៗ ឆ្ពោះទៅរកជីវិតរុងរឿងក្នុងសម័យសន្តិភាពផងដែរ៕