ក្រសួងឧស្សាហកម្ម បញ្ជាឱ្យសិក្សាជាបន្ទាន់អំពីប្រភពទឹកឆៅដែលត្រូវផ្គត់ផ្គង់
- 2019-02-11 04:47:13
- ចំនួនមតិ 0 | ចំនួនចែករំលែក 0
ក្រសួងឧស្សាហកម្ម បញ្ជាឱ្យសិក្សាជាបន្ទាន់អំពីប្រភពទឹកឆៅដែលត្រូវផ្គត់ផ្គង់
ចន្លោះមិនឃើញ
ក្រសួងឧស្សាហកម្ម និងសិប្បកម្ម បានសម្តែងការព្រួយបារម្ភអំពីការខ្វះទឹកស្អាតប្រើប្រាស់នៅតាមបណ្តាខេត្តមួយចំនួននៅក្នុងគ្រោះរាំងស្ងួត នារដូវប្រាំងខាងមុខនេះ និងបានបញ្ជាឱ្យមន្ទីរឧស្សាហកម្ម និងសិប្បកម្ម រាជធានី ខេត្ត ទាំងអស់សិក្សាជាបន្ទាន់ និងសហការជាមួយមន្ទីរធនធានទឹក និងឧតុនិយម អំពីប្រភពទឹកឆៅដែលត្រូវផ្គត់ផ្គង់ និងបញ្ហាប្រឈមនៅពេលដែលគ្មានភ្លៀងនៅក្នុងរដូវប្រាំង។ នេះបើតាមការបញ្ជាក់របស់លោក អ៊ុំ សុថា រដ្ឋលេខាធិការក្រសួងឧស្សាហកម្ម និងសិប្បកម្ម នៅក្នុងសិក្ខាសាលាស្តីពីការដាក់ឱ្យប្រើប្រាស់បទដ្ឋានបច្ចេកទេសអប្បបរមាសម្រាប់ប្រព័ន្ធផ្គត់ផ្គង់ទឹកស្អាតខ្នាតតូច នៅសណ្ឋាគារភ្នំពេញ នាព្រឹកថ្ងៃទី១១ ខែកុម្ភៈ ឆ្នាំ២០១៩។
លោក អ៊ុំ សុថា បានបញ្ជាក់ថា ក្រសួងឧស្សាហកម្ម និងសិប្បកម្ម បានព្រាងលិខិតសុំការគាំទ្រពីក្រសួងធនធានទឹក និងឧតុនិយម ដើម្បីសុំទទួលបាននូវព័ត៌មានស្តីពីប្រភពទឹកឆៅទូទាំងប្រទេសជាផែនទី ដើម្បីយកមកធ្វើការសិក្សា។ លោកថា កន្លែងណាដែលជួបបញ្ហាប្រឈមខ្លាំង ក្រសួងនឹងមានការធ្វើអន្តរាគមន៍ «ប៉ុន្តែការធ្វើអន្តរាគមន៍ពេលខ្លះអស់លទ្ធភាពមិនដឹងធ្វើម៉េច ព្រោះទឹកដែលរីង មានតែយកទឹកពីកន្លែងផ្សេងមកទេ មិនអាចធ្វើម៉េចកើតទេ ក្រៅពីហ្នឹង»៕