ក្រសួងគាំទ្រគម្រោងរោងចក្រសូឡានៅជិតផ្សារបាត់ដឹង ដោយតម្លៃលក់ជូន EDC តែជាង ៣០០រៀល

2019-02-13 02:07:14
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កិច្ចប្រជុំអន្តរក្រសួងដែលដឹកនាំដោយក្រសួងបរិស្ថាន បានពិនិត្យឃើញថា គម្រោងរោងចក្រផលិតថាមពលអគ្គិសនីដើរដោយពន្លឺព្រះអាទិត្យ (សូឡា) នៅខេត្តកំពង់ស្ពឺ ពិតជាមានសារៈប្រយោជន៍សម្រាប់កម្ពុជា ដោយថ្លៃអគ្គិសនីលក់ជូនអគ្គិសនីកម្ពុជា EDC ក្នុងតម្លៃ ៧,៦សេនដុល្លារ (៣០៣រៀល) ក្នុងមួយគីឡូវ៉ាត់ម៉ោង ហើយថែមទាំងជួយកាត់បន្ថយការបញ្ចេញឧស្ម័នផ្ទះកញ្ចក់បានច្រើនទៀតផង។

កិច្ចប្រជុំខាងលើនេះ ធ្វើឡើងកាលពីព្រឹកថ្ងៃទី១២ ខែកុម្ភៈ ឆ្នាំ២០១៩ ដឹកនាំលោក សៅ សុភាព រដ្ឋលេខាធិការក្រសួងបរិស្ថាន ដើម្បីពិនិត្យនិងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមពេញលេញសម្រាប់គម្រោងអភិវឌ្ឍន៍ និងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យកម្លាំង៦០មេហ្គាវ៉ាត់នៅខេត្តកំពង់ស្ពឺរបស់ក្រុមហ៊ុន SCHNEITEC RENEWABLE ដែលត្រូវបានសិក្សារៀបចំឡើងដោយក្រុមហ៊ុនទីប្រឹក្សា E & A Consultant។

របាយការណ៍ EIA គ្របដណ្តប់លើចំណុចសំខាន់ៗ ដូចខាងក្រោម៖

១-ធ្វើការពិនិត្យ វិភាគ និងបង្ហាញពីលក្ខណៈ និងព័ត៌មានរបស់គម្រោងអភិវឌ្ឍន៍ និងបង្កើតស្ថានីយផលិតអគ្គិសនីដើរដោយពន្លឺព្រះអាទិត្យកម្លាំង៦០មេហ្គាវ៉ាត់លើផ្ទៃដីទំហំ១១៥ហិកតា។

២-សិក្សាអំពីធនធានរូបសាស្រ្ត ធនធានជីវសាស្រ្ត និងធនធានសេដ្ឋកិច្ចសង្គមនៅក្នុង និងជុំវិញតំបន់គម្រោងដើម្បីជាទិន្ន័យគោលមួយ ក្នុងការវាយតម្លៃហេតុប៉ះពាល់បរិស្ថាន និងសង្គម

៣-រៀបចំកិច្ចពិគ្រោះយោបល់ជាមួយប្រជាពលរដ្ឋ អាជ្ញាធរមូលដ្ឋាន និងមន្ទីរជំនាញពាក់ព័ន្ធសម្រាប់ផ្តល់យោបល់លើគម្រោង

៤-កំណត់ទំហំនៃហេតុប៉ះពាល់បរិស្ថានទៅលើធនធានបរិស្ថានធម្មជាតិ និងបរិស្ថានសង្គមដែលមានស្រាប់ នៅក្នុងតំបន់សិក្សាទាំងវិជ្ជមាន និងអវិជ្ជមាន ដោយសារសកម្មភាពដំណើការរបស់គម្រោង

៥-កំណត់នូវវិធានការកាត់បន្ថយហេតុប៉ះពាល់បរិស្ថាន និងសង្គម (អវិជ្ជមាន) ដែលអាចកើតមានឡើងពីសកម្មភាពគម្រោងឱ្យដល់កម្រិតអប្បបរមា

៦-វិភាគតម្លៃសេដ្ឋកិច្ច និងតម្លៃបរិស្ថាន ទាំងផ្នែកវិជ្ជមាន និងអវិជ្ជមាន

៧-រៀបចំមូលនិធិបរិស្ថាន និងសង្គមដើម្បីស្តារបរិស្ថានឡើងវិញ និងចូលរួមអភិវឌ្ឍន៍ភូមិ ឃុំដែលពាក់ព័ន្ធនឹងគម្រោងវិនិយោគ។

ក្រសួងបរិស្ថាន បានឱ្យដឹងថា របាយការណ៍នេះត្រូវបានរៀបចំឡើងបានត្រឹមត្រូវ ហើយអង្គប្រជុំបានផ្តល់មតិយោបល់មួយចំនួនទៀតបន្ថែមទៅលើមតិយោបល់ ដែលបានផ្តល់ជូនកន្លងមកដោយនាយកដ្ឋាន EIA ដើម្បីឱ្យក្រុមហ៊ុនទីប្រឹក្សាយកទៅពិនិត្យកែសម្រួលរបាយការណ៍នេះឡើងវិញ។

សូមរំលឹកថា ក្រុមប្រឹក្សាអភិវឌ្ឍន៍កម្ពុជា (CDC) បានយល់ព្រមលើគម្រោងសាងសង់ស្ថានីយផលិតថាមពល ដើរដោយថាមពលពន្លឺព្រះអាទិត្យរបស់ក្រុមហ៊ុន SCHNEITEC RENEWABLE កាលពីខែវិច្ឆិកា ឆ្នាំ២០១៨។ គម្រោងវិនិយោគនេះ មានទីតាំងស្ថិតនៅតាមបណ្តោយផ្លូវជាតិលេខ៥១ ក្បែរសាលានាយទាហានសកម្មត្មាតពង ក្នុងឃុំដំណាក់រាំង ស្រុកឧដុង្គ ខេត្តកំពង់ស្ពឺ ដែលនៅមិនឆ្ងាយប៉ុន្មានឡើយពីផ្សារបាត់ដឹង។ ការសាងសង់នេះ គ្រោងនឹងចំណាយទុនប្រមាណ ៥៨,២៣លានដុល្លារ និងអាចបង្កើតការងារបាន ៣៥កន្លែង៕