ជប៉ុន ផ្ដល់ជំនួយជាង៥០ម៉ឺនដុល្លារ សម្រាប់គម្រោងមួយ នៅខេត្តបាត់ដំបង

2019-02-13 02:12:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

រដ្ឋាភិបាលជប៉ុន បានឯកភាពផ្តល់ថវិកាជាង ៥២ម៉ឺនដុល្លារអាមេរិកដល់អង្គការសន្តិស្ម័គ្រចិត្ត ក្រោមគម្រោងជំនួយឧបត្ថម្ភឥតសំណង សម្រាប់គម្រោងអភិវឌ្ឍន៍សាលាមត្តេយ្យសិក្សាធនធានខេត្តបាត់ដំបង របស់អង្គការក្រៅរដ្ឋាភិបាលជប៉ុន។ នេះបើតាមការចុះផ្សាយរបស់ក្រសួងព័ត៌មាន កាលពីថ្ងៃទី១២ ខែកុម្ភៈ ឆ្នាំ២០១៩។

កិច្ចសន្យាផ្តល់ជំនួយនេះ ត្រូវបានចុះហត្ថលេខា កាលពីរសៀលថ្ងៃទី១២ ខែកុម្ភៈ ឆ្នាំ២០១៩ នៅស្ថានទូតជប៉ុន រវាងលោក ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំកម្ពុជា និងលោក Kase Takashi នាយកអង្គការសន្តិស្ម័គ្រចិត្ត សម្រាប់ គម្រោងសាលារៀនមត្តេយ្យសិក្សាធនធានគំរូ ផ្តោតលើបណ្ណាល័យ ក្នុងខេត្តបាត់ដំបង។

លោក ហូរីណូអ៊ុជិ ហ៊ីដេហ៊ីសា ថ្លែងថា ថវិកាជំនួយប្រមាណជាង ៥២ម៉ឺនដុល្លារអាមេរិក ដែលរដ្ឋាភិបាលជប៉ុនផ្តល់ដល់អង្គការសន្តិស្ម័គ្រចិត្តនេះ នឹងបង្កើតសាលារៀនមត្តេយ្យ គំរូបំពាក់ដោយបណ្ណាល័យ លើកកម្ពស់ការអានសៀវភៅក្នុងការអប់រំកុមារតូច និងបង្កើន សមត្ថភាពគ្រូបង្រៀនសាលាមត្តេយ្យក្នុងខេត្តបាត់ដំបង ដើម្បីកែលម្អគុណភាព នៃការអប់រំកុមារតូច និងអភិវឌ្ឍឲ្យកាន់តែប្រសើរឡើងសម្រាប់កុមារតូច។

តាមរយៈគម្រោងនេះ លោកទូតសង្ឃឹមថា សកម្មភាពរបស់បណ្ណាល័យ នឹងរីកចម្រើននៅទូទាំងខេត្ត ហើយការអប់រំកុមារតូចក្នុងខេត្តបាត់ដំបង នឹងអភិវឌ្ឍកាន់តែខ្លាំង។

លោក Kase Takashi បានសន្យាថា ក្នុងដំណាក់កាលនៃការរៀបចំគម្រោងនេះ អង្គការរបស់លោកបានពិគ្រោះយោបល់យ៉ាងជិតស្និទ្ធ និងសហការជាមួយមន្ទីរ ការិយាល័យអប់រំ យុវជន និងកីឡាខេត្តបាត់ដំបង និងសាលាមត្តេយ្យសិក្សាធនធានបាត់ដំបង ហើយនឹងប្រឹង ប្រែងអស់ពីសមត្ថភាព ដើម្បីរក្សានូវកិច្ចសហប្រតិបត្តិការល្អ នៅដំណាក់កាលនៃការអនុវត្តគម្រោងនេះ។ ជាពិសេសគម្រោងនេះ អាចរួមចំណែកដល់ការបង្កើតទំនាក់ទំនង មិត្តភាព រវាងជប៉ុន និងកម្ពុជា៕

រូបថត៖ ក្រសួងព័ត៌មាន

អត្ថបទ៖ លាភ.