សម្ដេច ស ខេង រិះគន់គណៈបញ្ជាការឯកភាពខេត្តព្រះសីហនុ ដែលប្រើកម្លាំងលើប្រជាពលរដ្ឋ

2019-02-13 02:54:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានថ្លែងរិះគន់ទៅលើគណៈបញ្ជាការឯកភាពខេត្តព្រះសីហនុ ដែលបានយកកម្លាំងយោធាទៅអនុវត្តសាលដីកា និងមានការប្រើហិង្សាលើប្រជាពលរដ្ឋ នៅក្នុងជម្លោះដីធ្លីមួយ នៅនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីថ្ងៃទី២៤ ខែមករា ឆ្នាំ២០១៩។ សម្តេចក្រឡាហោម បានថ្លែងរិះគន់យ៉ាងដូច្នេះ នៅក្នុងពិធីបើកសន្និបាតត្រួតពិនិត្យការងារឆ្នាំ២០១៨ លើកទិសដៅការងារឆ្នាំ២០១៩ នៅព្រឹកថ្ងៃទី១៣ ខែកុម្ភៈ ឆ្នាំ២០១៩នេះ នៅក្រសួងមហាផ្ទៃ។

សម្តេចក្រឡាហោម ថ្លែងក្នុងពិធីបើកសន្និបាតត្រួតពិនិត្យការងារឆ្នាំ២០១៨ លើកទិសដៅការងារឆ្នាំ២០១៩ របស់ក្រសួងមហាផ្ទៃ

សម្តេចក្រឡាហោម បានថ្លែងថា៖ «នៅខេត្តព្រះសីហនុ ថ្ងៃមុនទៅដោះស្រាយរឿងដី ចង់និយាយថា យើងអ្នកច្បាប់ អ្នករដ្ឋបាលផង អ្នកច្បាប់ផង យើងត្រូវដឹង គាត់ទៅយកកម្លាំងអនុវត្តច្បាប់ នគរបាល និងប៉េអឹម គឺត្រូវហើយ ប៉ុន្តែគាត់ទៅយកកម្លាំងយោធាខុសហើយ គេមិនយកកម្លាំងយោធាទៅអនុវត្តដីកាទេ។ រឿងកើតនៅខេត្តក្រចេះ និងនៅខេត្តព្រះសីហនុ មានន័យថា យើងរដ្ឋបាលខេត្តប៉ុនណាណី អត់ដឹងច្បាប់ ប្រយ័ត្នដល់ខេត្តផ្សេងទៀត។ ខ្ញុំនិយាយច្រើនដងហើយ គ្រាន់តែខ្ញុំលើកមកនិយាយទៀត ថាបើធ្វើទៅយើងមិនធ្វើខុស ប៉ុន្តែដល់យើងទៅធ្វើ ធ្វើខុសច្បាប់ អាហ្នឹងក៏បានតែខុសទៀត»។

គួររំលឹកផងដែរថា ទាក់ទងករណីផ្ទុះអាវុធបណ្តាលឲ្យប្រជាពលរដ្ឋរងរបួស នៅក្នុងជម្លោះដីធ្លីនៅភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ កាលពីថ្ងៃទី២៤ ខែមករា ឆ្នាំ២០១៩ អភិបាលខេត្តព្រះសីហនុ បានធ្វើរបាយការណ៍ជូនសម្តេច ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ រួចហើយ។

លោក យន្ត មីន អភិបាលខេត្តព្រះសីហនុ បានបញ្ជាក់នៅក្នុងរបាយការណ៍នោះថា មានកម្លាំងសមត្ថកិច្ចខ្លះ បានបាញ់ឡើងលើជាការគំរាម តែមិនមែនជាការបាញ់ដោយចេតនា ឬមានការបញ្ជាឲ្យធ្វើដូច្នេះឡើយ។ ចំពោះជនរងគ្រោះដោយគ្រាប់កាំភ្លើង សមត្ថកិច្ចកំពុងស្រាវជ្រាវរកជនបង្ក ព្រោះសង្ស័យថា មានជនទី៣ បង្កប់ជាមួយក្រុមប្រជាពលរដ្ឋ។

លោក យន្ត មីន អភិបាលខេត្តព្រះសីហនុ ថ្លែងនាពេលកន្លងមក

យោងតាមរបាយការណ៍ដដែល នៅព្រឹកថ្ងៃទី២៤ ខែមករា ឆ្នាំ២០១៩ លោក ផៃ ប៊ុនវណ្ណៈ អភិបាលរងខេត្តព្រះសីហនុ និងជាប្រធានក្រុមការងារតាមលិខិតបង្គាប់ការលេខ ០០៦/១៩ លបក ចុះថ្ងៃទី២៣ ខែមករា ឆ្នាំ២០១៩ របស់រដ្ឋបាលខេត្តព្រះសីហនុ បានដឹកនាំកម្លាំងគណៈបញ្ជាការឯកភាពរដ្ឋបាលខេត្តមាន៖ កម្លាំងអាវុធហត្ថចំនួន ១០០នាក់ កម្លាំងយោធាចំនួន ១០០នាក់ កម្លាំងនគរបាលចំនួន ១០០នាក់ និងមន្ត្រីរដ្ឋបាលខេត្តស្រុក និងមន្ទីរអង្គភាពពាក់ព័ន្ធចំនួន ២០នាក់ តាមសំណើសុំលេខ ១៣៩ អ.យ.ក/១០ ចុះថ្ងៃទី១៤ ខែមករា ឆ្នាំ២០១៩ របស់អយ្យការអមសាលាដំបូងខេត្តព្រះសីហនុ ដើម្បីចូលរួមសហការអនុវត្តសាលដីកាលេខ ៣៤៨ “ឈ” ចុះថ្ងៃទី២១ ខែវិច្ឆិកា ឆ្នាំ២០១៧ របស់តុលាការកំពូល ក្រោមការដឹកនាំបញ្ជារបស់លោកព្រះរាជអាជ្ញា សៀង សុខ ព្រះរាជអាជ្ញារង ហួត វិចិត្រ និងព្រះរាជអាជ្ញា កៀង សុន្ធរោ។

លោកអភិបាលខេត្តបានបន្តថា មុនពេលចុះដល់ទីតាំងដីដែលត្រូវអនុវត្ត ប្រជាពលរដ្ឋប្រមាណជា ២០០នាក់ បានធ្វើការរារាំងដូចជា ដុតកង់ឡានជាច្រើនកន្លែង ប្រើប្រាស់ដបសាំង ចម្ពាមកៅស៊ូប្រើគ្រាប់សំណ គ្រាប់ដែកថ្នាំងអំពៅ និងដុំថ្ម ប្រឆាំងតបតនឹងកម្លាំងរបស់សមត្ថកិច្ច ក្នុងពេលនោះបណ្តាលឲ្យគ្រឿងចក្រមួយគ្រឿងឆាបឆេះ តែត្រូវបានពន្លត់ដោយបំពង់ពន្លត់អគ្គិភ័យ បានទាន់ពេល ពេលនោះកម្លាំងទាំងអស់ត្រូវបានដកថយមួយជំហានសិន។

លោកអភិបាលបន្ថែមថា ក្រោយពីការដកថយបានបន្តិចមក លោកព្រះរាជអាជ្ញា ក៏បានដាក់បញ្ជាដឹកនាំជាថ្មី ឲ្យកម្លាំងបំបែកជាពីរមុខសញ្ញា ដោយកម្លាំងក្រុមទី១ ចូលចំពីមុខ និងកម្លាំងក្រុមទី២ ចូលច្រកចំហៀង។ នៅពេលចូលអនុវត្តជាលើកទីពីរ ប្រជាពលរដ្ឋបានប្រើប្រាស់ដបសាំងកាន់តែខ្លាំង សម្រុកមកលើសមត្ថកិច្ច មានការប្រតាយគ្នា បណ្តាលឲ្យសមត្ថកិច្ចរងរបួសចំនួន ៧នាក់ ជាហេតុធ្វើឲ្យសមត្ថកិច្ចផ្ទុះអាវុធបាញ់ឡើងលើ ប្រមាណជា ២០គ្រាប់ បណ្តាលឲ្យប្រជាពលរដ្ឋរបួស (រត់បុកគ្នា) និងរបួសធ្ងន់ម្នាក់ ដោយត្រូវគ្រាប់កាំភ្លើង។ ហើយប្រជាពលរដ្ឋចំនួន ៦នាក់ (របួស ២នាក់) ត្រូវបានចាប់ខ្លួន។

ប្រជាពលរដ្ឋដែលត្រូវបានចាប់ខ្លួន

លោក យន្ត មីន បានបញ្ជាក់ថា ចំពោះការផ្ទុះអាវុធ គឺការអនុវត្តខុសពីបទបញ្ជារបស់គណៈបញ្ជាការឯកភាពដែលបានណែនាំក្នុងពេលប្រជុំ និងមុនចុះអនុវត្ត តែដោយសារសភាពការណ៍ពិបាកទប់ទល់ មានភាពតានតឹងខ្លាំង និងដោយមានការប្តេជ្ញាចិត្តរបស់ព្រះរាជអាជ្ញា ក៏ដូចជាក្រុមការងារ និងកងកម្លាំងទាំងអស់ថា ត្រូវតែអនុវត្តសាលដីការបស់តុលាការកំពូលឲ្យបាន ទើបមានកម្លាំងខ្លះ បានបាញ់ឡើងលើជាការគំរាម តែមិនមែនជាការបាញ់ដោយចេតនា ឬមានការបញ្ជាឲ្យធ្វើដូច្នេះឡើយ។

លោកបន្តទៀតថា ចំពោះប្រជាពលរដ្ឋដែលជាជនបង្កចំនួន ៤នាក់ ត្រូវបានសមត្ថកិច្ចធ្វើការអប់រំ ណែនាំ និងបានដោះលែងឲ្យទៅលំនៅឋានវិញ ហើយអ្នករបួសស្រាលបានចេញពីមន្ទីរពេទ្យបង្អែកខេត្ត។ រីឯអ្នករងរបួសធ្ងន់ឈ្មោះ ពៅ សារ័ត្ន ភេទប្រុស អាយុ ២៨ឆ្នាំ កំពុងសម្រាកព្យាបាល នៅមន្ទីរពេទ្យលោកសង្ឃ៕

ចុចអាន៖ អភិបាលខេត្តព្រះសីហនុ រាយការណ៍ជូនរដ្ឋមន្ត្រីមហាផ្ទៃ រឿងផ្ទុះអាវុធបណ្តាលឲ្យពលរដ្ឋរបួស

អត្ថបទ៖ សុខ សុវត្ថិ