កម្ពុជា កំពុងរៀបចំទីតាំងត្រៀមធ្វើសមយុទ្ធនាគមាសជាមួយចិន នាខែក្រោយ

2019-02-13 03:45:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កងទ័ពកម្ពុជាកំពុងរៀបចំទីលាន អាគារស្នាក់នៅ ប្រព័ន្ធផ្លូវ និងហេដ្ឋារចនាសម្ព័ន្ធផ្សេងទៀត ដើម្បីបម្រើឱ្យសមយុទ្ធយោធានាគមាសឆ្នាំ ២០១៩ ជាមួយកងទ័ពរំដោះប្រជាជនចិន ដែលគ្រោងធ្វើនៅខែមីនា ឆ្នាំ២០១៩។

សមយុទ្ធនាគមាសរវាងកងទ័ពកម្ពុជា-ចិន កាលពីខែមីនា ឆ្នាំ២០១៨ នៅខេត្តកំពង់ស្ពឺ

អគ្គមេបញ្ជាការរង និងជានាយកសេនាធិការចម្រុះនៃកងយោធពលខេមរភូមិន្ទ លោកនាយឧត្តមសេនីយ៍ ឥត សារ៉ាត់ ថ្លែងនៅក្នុងពេលចុះត្រួតពិនិត្យសកម្មភាពសាងសង់ទីតាំងធ្វើសមយុទ្ធ កាលពីថ្ងៃទី១១ កុម្ភៈថា សមយុទ្ធនាគមាសលើកនេះ នឹងមានទ្រង់ទ្រាយធំជាងមុន ដូច្នេះលោកបញ្ជាឱ្យអង្គភាពពាក់ព័ន្ធទាំងអស់ត្រូវប្រឹងប្រែងតាមជំនាញ និងកែសម្រួលចំណុចខ្វះខាត ដើម្បីធ្វើយ៉ាងណាឱ្យលំហាត់នាគមាសនេះ ទទួលបានជោគជ័យ។

លោកនាយឧត្តមសេនីយ៍ ឥត សារ៉ាត់ ថ្លែងនាពេលកន្លងមក

សមយុទ្ធយោធានាគមាសនៅឆ្នាំនេះ នឹងធ្វើឡើងនៅទីលានហ្វឹកហ្វឺនបាញ់គ្រាប់ពិតនៃកងពលតូចលេខ ៧០ ស្ថិតក្នុងស្រុកជុំគិរី ខេត្តកំពត។ សមយុទ្ធយោធាជាមួយកងទ័ពចិននៅឆ្នាំនេះ ប្រព្រឹត្តទៅក្រោមរបៀបវារៈ ប្រឆាំងភេរវកម្ម និងផ្នែកមនុស្សធម៌។ សមយុទ្ធនេះ នឹងធ្វើឱ្យកងទ័ពនៃប្រទេសទាំងពីរកាន់តែជិតស្និទ្ធក្នុងបេសកកម្មការងាររួមគ្នា។

ប៉ុន្មានឆ្នាំចុងក្រោយនេះ កម្ពុជា បានធ្វើសមយុទ្ធយោធាជាមួយប្រទេសចិនជាបន្តបន្ទាប់ ហើយក្រុងប៉េកាំងក៏បានផ្ដល់ជំនួយច្រើនសន្ធឹកសន្ធាប់ដល់កម្ពុជាផងដែរ។ ជាក់ស្ដែងកាលពីពាក់កណ្ដាលឆ្នាំ ២០១៨ កន្លងទៅ ចិនបានផ្ដល់ជំនួយឥតសំណងជាទឹកប្រាក់ប្រមាណ ១០០លានដុល្លារអាមេរិក ដល់វិស័យយោធាកម្ពុជា។

សូមរំលឹកថា កាលពីខែមីនា ឆ្នាំ២០១៨ កងទ័ពកម្ពុជា-ចិន បានធ្វើសមយុទ្ធនាគមាស នៅភូមិសាស្រ្តតំបន់ភ្នំធំម្រះព្រៅ ភូមិថ្លុកដូនស ឃុំក្រាំងអំពិល ស្រុកសំរោងទង ខេត្តកំពង់ស្ពឺ។ សមយុទ្ធនេះ ផ្តោតទៅលើការប្រឆាំងភេរវកម្ម សង្គ្រោះបន្ទាន់ លំហាត់បាញ់គ្រាប់ពិត និងប្រើប្រាស់សព្វាវុធទំនើបៗដូចជា ឧទ្ធម្ភាគចក្រ Z10 បំពាក់កាំជ្រួចបាញ់ចំគោលដៅ កាំភ្លើងត្បាល់ចូលគោលដៅដែលបានកំណត់ និងរថពាសដែកផងដែរ៕