អាកាសយានដ្ឋានកម្ពុជា កំពុងត្រូវបានរៀបចំ ចំណត និងពង្រីកផ្លូវរត់យន្តហោះ

2019-02-13 06:15:16
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនបារាំង SCA បាននឹងកំពុងរៀបចំចំណតយន្តហោះ និងពង្រីកបន្ថែមផ្លូវរត់យន្តហោះ នៅអាកាសយានដ្ឋានអន្តរជាតិរបស់កម្ពុជា ដើម្បីត្រៀមទទួលយន្តហោះរបស់គណៈប្រតិភូដែលនឹងអញ្ជើញមកចូលរួមកិច្ចប្រជុំកំពូលអាស៊ី-អឺរ៉ុប និងកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះនាពេលបន្តបន្ទាប់ និងដើម្បីបង្កើនភ្ញៀវទេសចរផងដែរ។ នេះបើតាមខ្លឹមសារនៃកិច្ចប្រជុំគណៈកម្មការតាមដាន និងត្រួតពិនិត្យការសាងសង់អាកាសយានដ្ឋានអន្តរជាតិទាំងអស់នៅកម្ពុជា ជាមួយនឹងក្រុមហ៊ុនសម្បទានបារាំង SCA កាលពីថ្ងៃទី១២ ខែកុម្ភៈ ឆ្នាំ២០១៩ នៅទីស្តីការគណៈរដ្ឋមន្ត្រី។ កិច្ចប្រជុំនេះ ធ្វើឡើងក្រោមអធិបតីភាពលោក តឹករ៉េត សំរេច រដ្ឋលេខាធិការទីស្តីការគណៈរដ្ឋមន្ត្រី និងជាប្រធានគណៈកម្មការ ដោយមានវត្តមានចូលរួមពីភាគីពាក់ព័ន្ធផងដែរ។

កិច្ចប្រជុំនៅទីស្តីការគណៈរដ្ឋមន្រ្តី កាលពីថ្ងៃទី១២ ខែកុម្ភៈ ឆ្នាំ២០១៩ (រូបថត៖ ទំព័រហ្វេសប៊ុកអង្គភាពព័ត៌មានរហ័ស និងប្រតិកម្មរហ័ស)

យោងតាមទំព័រហ្វេសប៊ុកអង្គភាពព័ត៌មានរហ័ស និងប្រតិកម្មរហ័ស នៃទីស្តីការគណៈរដ្ឋមន្រ្តី ដែលបានដកស្រង់ខ្លឹមសារនៃកិច្ចប្រជុំខាងលើនេះ ឱ្យដឹងថា ក្រុមហ៊ុន SCA បាននឹងកំពុងរៀបចំចំណតយន្តហោះថ្មីមួយកន្លែង នៅព្រលានយន្តហោះអន្តរជាតិភ្នំពេញឱ្យរួចរាល់ក្នុងខែមិថុនា ឆ្នាំ២០១៩ ដែលនឹងអាចទទួលយន្តហោះប្រភេទ Code C (Airbus 320, Airbus 321) ចំនួន១២គ្រឿងចតបាន ដើម្បីត្រៀមលក្ខណ:សម្រាប់ទទួលយន្តហោះថ្នាក់ដឹកនាំនានាដែលអញ្ជើញមកចូលរួមកិច្ចប្រជុំអាស៊ី-អឺរ៉ុប នៅឆ្នាំ២០២០ខាងមុខនេះ។

ទន្ទឹមនឹងនេះដែរ ក្រុមហ៊ុន SCA បាននឹងកំពុងពង្រីកបន្ថែមផ្លូវរត់យន្តហោះ ពី២៥០០ម ទៅ៣៣០០ម នៅព្រលានយន្តហោះអន្តរជាតិខេត្តព្រះសីហនុ ឱ្យបានរួចរាល់ទាន់ពេលសម្រាប់ទទួលយន្តហោះថ្នាក់ដឹកនាំនានាដែលអញ្ជើញមកចូលរួមកិច្ចប្រជុំកំពូលអាស៊ាននៅកម្ពុជា នៅចុងឆ្នាំ២០២២ ខាងមុខនេះ និងដើម្បីឱ្យយន្តហោះខ្នាតធំប្រភេទ Code E ដូចជា Boeing 777 អាចចុះចតបានផងដែរ ក្នុងគោលដៅបង្កើនភ្ញៀវទេសចរមកកាន់កម្ពុជា។

សូមបញ្ជាក់ថា គម្រោងទាំងពីរនេះ ត្រូវបានយកមកជជែកពិភាក្សាអំពីផែនការថវិការបស់ក្រុមហ៊ុន SCA ក្នុងឆ្នាំ២០១៩នេះ សម្រាប់ព្រលានយន្តហោះអន្តរជាតិទាំង៣ នៅកម្ពុជា បច្ចុប្បន្ន ភ្នំពេញ សៀមរាប និងព្រះសីហនុ៕