បំណុលរបស់អាមេរិក ឡើងខ្ពស់បំផុតក្នុងប្រវត្តិសាស្រ្ត

2019-02-13 09:07:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

បំណុលសាធារណៈរបស់អាមេរិក បានកើនឡើងដល់ ២០,០១ទ្រីលានដុល្លារ គិតត្រឹមថ្ងៃទី១១ ខែកុម្ភៈ ឆ្នាំ២០១៩ ដែលនេះជាចំនួនដ៏ខ្ពស់បំផុតក្នុងប្រវត្តិសាស្រ្តរបស់ប្រទេសនេះ។ នេះបើតាមរបាយការណ៍ដែលចេញផ្សាយដោយក្រសួងរតនាគារអាមេរិក កាលពីថ្ងៃទី១២ ខែកុម្ភៈ។

ក្រុមអ្នកវិភាគអះអាងថា ការកាត់បន្ថយពន្ធប្រមាណ ១,៥ទ្រីលានដុល្លាររបស់រដ្ឋបាលដូណាល់ ត្រាំ និងការបង្កើនការចំណាយរដ្ឋាភិបាល (ពិសេសការចំណាយយោធា) គឺជាកត្តាដែលបង្កឱ្យមានឱនភាពថវិកា និងបំណុលសាធារណៈកើនឡើងយ៉ាងឆាប់រហ័ស។

ការិយាល័យថវិកាសភា (CBO) កាលពីខែមុនបានប៉ាន់ស្មានថា ឱនភាពថវិកាអាមេរិកនៅឆ្នាំ២០១៩នេះ គឺប្រហែល ៩០០ពាន់លានដុល្លារ ហើយនឹងលើសពី ១ទ្រីលានដុល្លារ ក្នុងមួយឆ្នាំ ចាប់ពីឆ្នាំ២០២២តទៅ។

លោក Michael A. Peterson នាយកប្រតិបត្តិមូលនិធិ Peter G. Peterson ដែលជាអង្គការពាក់ព័ន្ធនឹងសារពើពន្ធរយៈពេលវែងរបស់អាមេរិក បានឱ្យដឹងថា ខណៈដែលអាមេរិកបន្តខ្ចីលុយរាប់ទ្រីលានដុល្លារទៀត នោះការចំណាយលើអត្រាការប្រាក់ នឹងក្លាយជាបន្ទុកសម្រាប់សេដ្ឋកិច្ច ហើយនឹងកាន់តែលំបាកក្នុងការផ្តល់មូលនិធិ លើការវិនិយោគសំខាន់ៗរបស់ប្រទេសនាពេលអនាគត។

លោកបញ្ជាក់យ៉ាងដូច្នេះថា៖ «យើងបង់ជាមធ្យមប្រមាណ ១ពាន់លានដុល្លារជារៀងរាល់ថ្ងៃរួចមកហើយ សម្រាប់អត្រាការប្រាក់នៃបំណុល ហើយនឹងត្រូវចំណាយប្រមាណ ៧ទ្រីលានដុល្លារ សម្រាប់អត្រាការប្រាក់ក្នុងរយៈពេលជាង ១ទសវត្សរ៍ក្រោយ»៕

ប្រភព៖ USAtoday ប្រែសម្រួល៖ សំភី