សម្តេច ហ៊ុន សែន ថាមិនចង់ជ្រៀតជ្រែកចូលកិច្ចការយុវវ័យ តែណែនាំកុំឱ្យប្រព្រឹត្តខុសប្រពៃណី

2019-02-14 01:38:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេច ហ៊ុន សែន បានលើកឡើងតាមរយៈទំព័រហ្វេសប៊ុកនៅព្រឹកថ្ងៃទី១៤កុម្ភៈនេះថា យុវជនយុវនារីខ្មែរ សុទ្ធតែដឹងពីអ្វីដែលគួរធ្វើ និងអ្វីដែលមិនគួរធ្វើ ជាពិសេសនៅថ្ងៃទិវានៃក្តីស្រឡាញ់នេះតែម្តង ដោយសម្តេចបញ្ជាក់ថា ការនិយាយនេះ មិនមែនចង់ជ្រៀតជ្រែកចូលកិច្ចការយុវវ័យនោះទេ តែការប្រព្រឹត្តខុសប្រពៃណីទំនៀមទម្លាប់ខ្មែរ ក៏មិនមែនជាកិច្ចការយុវជនយុវនារីដែរ។

សម្តេចនាយករដ្ឋមន្រ្តី បានរៀបរាប់បន្តថា៖ «តាមកដល់អាយុប៉ុណ្ណេះ តាក៏ធ្លាប់ឆ្លងកាត់ជីវិតយុវវ័យដែរ។ តាដឹងថា អារម្មណ៍រំភើបពេលជួបអ្នកដែលខ្លួនស្រលាញ់វាយ៉ាងដូចម្តេច។ នៅក្នុងសម័យយុវវ័យរបស់តា និងយាយ ទោះពេលនោះយើងស្ថិតក្នុងសម័យសង្គ្រាមតស៊ូ ទោះជាពួកយើងស្រលាញ់គ្នាយ៉ាងណា ក៏ពួកយើងនៅតែគោរពគ្នា រក្សាប្រពៃណី តស៊ូជាមួយគ្នារហូតដល់ក្លាយជាប្តីប្រពន្ធដែលទទួលស្គាល់ដោយសង្គម»។

ជាមួយគ្នានេះ ប្រមុខរាជរដ្ឋាភិបាល បានសម្តែងក្តីរីករាយចំពោះអត្ថបទរបស់អ្នកស្រាវជ្រាវសង្គមម្នាក់ ដែលបានកត់សម្គាល់ឃើញថា យុវវ័យបច្ចុប្បន្ន ហាក់ដូចជាមានភាពចាស់ទុំច្រើន បើប្រៀបធៀបមើលពីឥរិយាបទឆ្នាំមុនៗ នៅថ្ងៃបុណ្យនៃក្តីស្រឡាញ់នេះ។

«ជាការពិត តាតែងតែចង់ឃើញក្មួយៗចៅៗកម្មករ កម្មការិនីមានកូនពូនជាចៅដោយសុភមង្គល ហើយសុភមង្គលត្រូវតែកើតចេញពីការរៀបចំគ្រួសារមួយត្រឹមត្រូវតាមច្បាប់ និងទំនៀមទម្លាប់ ប្រពៃណីខ្មែរ អំពើផ្សេងពីនេះ នឹងមិននាំមកនូវសុភមង្គលឡើយ ទាំងខាងចៅស្រីក៏ដូចជាខាងចៅប្រុស»។ នេះជាការណែនាំបន្ថែមរបស់សម្តេច ហ៊ុន សែន៕