ចំណូលរបស់ប្រជាជនកម្ពុជាក្នុងម្នាក់ នឹងកើនឡើងបន្ថែមជិត ១៥០ដុល្លារទៀត នៅឆ្នាំ២០១៩
- 2019-02-14 02:38:09
- ចំនួនមតិ 0 | ចំនួនចែករំលែក 0
ចំណូលរបស់ប្រជាជនកម្ពុជាក្នុងម្នាក់ នឹងកើនឡើងបន្ថែមជិត ១៥០ដុល្លារទៀត នៅឆ្នាំ២០១៩
ចន្លោះមិនឃើញ
នៅក្នុងឆ្នាំ២០១៩នេះ ផលិតផលក្នុងស្រុកសរុប ហៅកាត់ GDP របស់កម្ពុជា នឹងកើនឡើងដល់ជាង២៧,២២ពាន់លានដុល្លារ គ្រាដែលចំណូលក្នុងមនុស្សម្នាក់ៗ ត្រូវបានរំពឹងថានឹងកើនឡើងដល់១៧០៦ដុល្លារ ធៀបនឹង ១៥៦៣ដុល្លារក្នុងឆ្នាំ២០១៨។ នេះបើតាមការថ្លែងរបស់លោក ឱក ប៊ុង រដ្ឋលេខាធិការក្រសួងពាណិជ្ជកម្ម នៅក្នុងពិធីបើកវគ្គបណ្តុះបណ្តាលស្តីពីមជ្ឈត្តការពាណិជ្ជកម្មនៅកម្ពុជា កាលពីព្រឹកថ្ងៃទី១៣ ខែកុម្ភៈ ឆ្នាំ២០១៩។
លោកបានមានប្រសាសន៍ថា ទាក់ទិននឹងកំណើនខាងលើគឺផ្តោតសំខាន់លើវិស័យសំខាន់ៗចំនួន០៣ រួមមាន៖
១. កំណើននៃវិស័យឧស្សាហកម្ម នៅបន្តរក្សាភាពរឹងមាំក្នុងអត្រាកំណើនប្រចាំឆ្នាំក្នុងរង្វង់១០ ភាគរយ ដែលគាំទ្រដោយភាពរឹងមាំនៃវិស័យសំណង់
២. វិស័យសេវាកម្មនៅបន្តកំណើនប្រមាណ៧ភាគរយ ដែលគាំទ្រដោយកំណើននៃអនុវិស័យសណ្ឋាគារ និងភោជនីយដ្ឋាន
និងទី៣. គឺវិស័យកសិកម្មអាចសម្រេចបានកំណើនក្នុងរង្វង់១,៨ភាគរយ ដែលទ្រទ្រង់ដោយអនុវិស័យដំណាំនិងជលផល។
លោករដ្ឋលេខាធិការលើកឡើងបន្តថា ទន្ទឹមនឹងមានការរីកចម្រើននៃសេដ្ឋកិច្ចជាតិដូចបានរៀបរាប់ខាងលើ វិវាទពាណិជ្ជកម្មក៏បានកើនឡើងដែរ ដូច្នេះវគ្គបណ្តុះបណ្តាលនេះ ពិតជាមានសារៈសំខាន់ណាស់ ក្នុងការប្រើប្រាស់យន្តការមជ្ឈត្តការពាណិជ្ជកម្ម ដើម្បីដោះស្រាយវិវាទពាណិជ្ជកម្ម បានកំពុងកើនឡើង ព្រោះថាមិនត្រឹមតែជាការបង្កើនប្រសិទ្ធភាពនៃការដោះស្រាយវិវាទប៉ុណ្ណោះទេ ប៉ុន្តែថែមទាំងផ្តល់នូវគុណសម្បតិ្តដល់ប្រពន្ធ័យុត្តិធម៌នៅកម្ពុជា ដើម្បីការពារសិទ្ធិស្របច្បាប់របស់ភាគីវិវាទឲ្យបានត្រឹមត្រូវទៀតផង៕