កម្ពុជា-វៀតណាម យល់ព្រមផ្ដល់ភាពអនុគ្រោះពន្ធ សូន្យភាគរយ សម្រាប់ទំនិញ
- 2019-02-14 03:55:46
- ចំនួនមតិ 0 | ចំនួនចែករំលែក 0
កម្ពុជា-វៀតណាម យល់ព្រមផ្ដល់ភាពអនុគ្រោះពន្ធ សូន្យភាគរយ សម្រាប់ទំនិញ
ចន្លោះមិនឃើញ
ក្រសួងពាណិជ្ជកម្មកម្ពុជា និងក្រសួងឧស្សាហកម្មនិងពាណិជ្ជកម្មវៀតណាម បានឯកភាពគ្នាក្នុងការផ្ដល់ភាពអនុគ្រោះពន្ធអត្រា សូន្យភាគរយ សម្រាប់ទំនិញនៃប្រទេសទាំងពីរមួយចំនួន។ នេះបើយោងតាមអត្ថបទព័ត៌មាន ដែលចុះផ្សាយដោយក្រសួងពាណិជ្ជកម្ម នាថ្ងៃទី១៣ ខែកុម្ភៈ ឆ្នាំ២០១៩។
ការឲ្យដឹងដូច្នេះ ត្រូវបានធ្វើឡើងក្នុងជំនួបពិភាក្សារវាងលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ជាមួយប្រតិភូក្រសួងឧស្សាហកម្ម និងពាណិជ្ជកម្មវៀតណាម ដឹកនាំដោយលោក ដូ វឹកហឹង (Do Quoc Hung) កាលពីថ្ងៃទី១៣ ខែកុម្ភៈ ឆ្នាំ២០១៩ នៅទីស្ដីការក្រសួង។
លោក ដូ វឹកហឹង បានជម្រាបជូនអំពីលទ្ធផលនៃកិច្ចចរចាពាណិជ្ជកម្មរវាងប្រទេសទាំងពីរ ដែលក្នុងនោះភាគីវៀតណាម បានឯកភាពផ្តល់ភាពអនុគ្រោះពន្ធអត្រា ០% (សូន្យភាគរយ) សម្រាប់ទំនិញកម្ពុជាចំនួន ៣២បន្ទាត់ពន្ធគយ រួមជាមួយកូតានាំចូលអង្ករចំនួន ៣០ម៉ឺនតោន និងសន្លឹកថ្នាំជក់ ៣០០០តោន នៅក្នុងឆ្នាំ២០១៩ និងឆ្នាំ២០២០។ ចំណែកភាគីកម្ពុជាបានផ្តល់ភាពអនុគ្រោះពន្ធអត្រា ០% (សូន្យភាគរយ) ដូចគ្នា ដល់ទំនិញវៀតណាមចំនួន ២៦បន្ទាត់ពន្ធគយ។
លោក ប៉ាន សូរស័ក្តិ បានវាយតម្លៃខ្ពស់ចំពោះកិច្ចប្រឹងប្រែងចរចា របស់គណៈប្រតិភូមន្ត្រីជាន់ខ្ពស់នៃប្រទេសទាំងពីរនាពេលកន្លងមក ជាពិសេសការសម្រេចបាននូវឯកសារ ស្តីពីកិច្ចសម្របសម្រួលជំរុញពាណិជ្ជកម្ម នៅតាមបន្ទាត់ព្រំដែន សម្រាប់ធ្វើការចុះហត្ថលេខា នៅក្នុងពេលឆាប់ៗខាងមុខ។
សូមជម្រាបថា កាលពីឆ្នាំ២០១៧ ទំហំពាណិជ្ជកម្មរវាងកម្ពុជា និងវៀតណាម សម្រេចបានគិតជាទឹកប្រាក់ ៣,៨ ពាន់លានដុល្លារអាមេរិក គឺបានកើនឡើង ២៩% ធៀបនឹងឆ្នាំ២០១៦។ ទន្ទឹមគ្នានេះ តាមរយៈគម្រោងវិនិយោគចំនួន ២០៦គម្រោង ដែលមានតម្លៃជាទឹកប្រាក់ប្រមាណ ៣,២ ពាន់លានដុល្លារ បានធ្វើឲ្យវៀតណាម ក្លាយជាដៃគូវិនិយោគធំទី៥ របស់កម្ពុជា ខណៈក្រុមហ៊ុនរបស់កម្ពុជា បានវិនិយោគត្រឹមតែ ១៨គម្រោង នៅក្នុងប្រទេសវៀតណាម ដែលតម្លៃជាទឹកប្រាក់ ៥៨,១លានដុល្លារប៉ុណ្ណោះ៕
រូបថត៖ ក្រសួងពាណិជ្ជកម្ម