កម្ពុជា-ថៃ ឯកភាពបន្តថែរក្សាសន្តិភាព ស្ថិរភាពតាមបណ្តោយព្រំដែន
- 2019-02-14 06:09:43
- ចំនួនមតិ 0 | ចំនួនចែករំលែក 0
កម្ពុជា-ថៃ ឯកភាពបន្តថែរក្សាសន្តិភាព ស្ថិរភាពតាមបណ្តោយព្រំដែន
ចន្លោះមិនឃើញ
កម្ពុជា-ថៃ បានឯកភាពជំរុញបន្តនូវភារកិច្ចក្នុងការថែរក្សាសន្តិភាព ស្ថិរភាពតាមបណ្តោយព្រំដែន នៃប្រទេសទាំងពីរ។ នេះបើយោងតាមសេចក្តីថ្លែងការណ៍រួម នៃកិច្ចប្រជុំគណៈកម្មាធិការព្រំដែនទូទៅកម្ពុជា-ថៃ លើកទី១៤ នៅថ្ងៃទី១៤ ខែកុម្ភៈ ឆ្នាំ២០១៩ នៅរាជធានីភ្នំពេញ។ កិច្ចប្រជុំនេះ ត្រូវបានដឹកនាំដោយសហប្រធានសម្ដេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ កម្ពុជា និងនាយឧត្តមសេនីយ៍ ប្រាវីត វង្សសុវណ្ណ (Prawit Wongsuwon) ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិថៃ។
កិច្ចប្រជុំនេះ ត្រូវបានរៀបចំឡើង ដោយយោងតាមកិច្ចព្រមព្រៀង នៃការបង្កើតកិច្ចសហប្រតិបត្តិការព្រំដែនរវាងកម្ពុជា និងថៃ ក្នុងគោលបំណងបង្កើនកិច្ចសហប្រតិបត្តិការ ដើម្បីសន្តិភាព និងសន្តិសុខ ក្នុងតំបន់ព្រំដែន ក៏ដូចជាការពង្រឹងបន្ថែមទៀតនូវទំនាក់ទំនងរវាងកងទ័ព និងកងឯកភាពសន្តិសុខ ពាក់ព័ន្ធដទៃទៀតរបស់កម្ពុជា និងថៃ។
ភាគីកម្ពុជា-ថៃ បានបញ្ជាក់អំពីសារៈសំខាន់ នៃការប្រជុំគណៈកម្មាធិការព្រំដែនទូទៅលើកទី១៤ ដែលបានផ្តល់នូវការណែនាំ និងទិសដៅ ដើម្បីជំរុញឲ្យទំនាក់ទំនងល្អដែលមានស្រាប់ និងកិច្ចសហប្រតិបត្តិការដ៏មានសារៈប្រយោជន៍ រវាងកងទ័ពទាំងពីរនៅគ្រប់កម្រិតទាំងអស់ កាន់តែប្រសើរឡើងថែមទៀត សម្រាប់ជាការលើកកម្ពស់ដល់សន្តិភាព ស្ថិរភាព និងសន្តិសុខ តាមបណ្តោយព្រំដែន។
ភាគីទាំងពីរបានពិនិត្យឡើងវិញនូវលទ្ធផលនៃការអនុវត្តកម្មវិធីកិច្ចសហប្រតិបត្តិការផ្សេងៗ ដែលដាក់ចេញដោយកិច្ចប្រជុំគណៈកម្មាធិការព្រំដែនទូទៅលើកទី១៣ កាលពីថ្ងៃទី២១ ខែមីនា ឆ្នាំ២០១៨ នៅទីក្រុងបាងកក ប្រទេសថៃ ដូចជា៖ កិច្ចសហប្រតិបត្តិការលើការឆ្លងកាត់ព្រំដែន បញ្ហាពលករ ការទប់ស្កាត់ និងបង្ក្រាបការជួញដូរគ្រឿងញៀន ការលើកកម្ពស់កិច្ចសហប្រតិបត្តិការរវាងកងទ័ពកម្ពុជា ជាមួយបណ្តាអង្គភាពសន្តិសុខថៃ ក្នុងតំបន់ព្រំដែន បញ្ហាកសិកម្ម បញ្ហាសុខភាពសាធារណៈ ការអភិវឌ្ឍជីវភាពរស់នៅ សាសនា និងវប្បធម៌។
សូមបញ្ជាក់ថា ប្រទេសថៃនឹងទទួលធ្វើជាម្ចាស់ផ្ទះនៃប្រជុំគណៈកម្មាធិការព្រំដែនទូទៅកម្ពុជា ថៃ លើកទី១៥ ហើយនឹងធ្វើការជូនដំណឹងមកភាគីកម្ពុជាអំពីកាលបរិច្ឆេទ និងទីកន្លែងនៅពេលក្រោយ៕