កម្ពុជា មានអគារជាង ១ពាន់ និងបុរីជាង ២០០ទីតាំង ដែលជាស្នាដៃស្ថាបត្យករ-វិស្វករខ្មែរ

2019-02-14 08:22:41
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងរៀបចំដែនដី នគរូបនីយកម្ម និងសំណង់ បានអះអាងថា បច្ចុប្បន្ននេះ កម្ពុជាមានអគារសាធារណៈចំនួន ១១២៧អគារ និងបុរីលំនៅឋានចំនួនជាង ២០០ទីតាំងធំៗ ដែលសុទ្ធសឹងតែមានការចូលរួមចំណែកពីស្ថាបត្យករ និងវិស្វករខ្មែរ។ នេះបើតាមការចុះផ្សាយរបស់ AKP កាលពីថ្ងៃទី១៣ ខែកុម្ភៈ ឆ្នាំ២០១៩។

លោក ឡៅ ទិព្វសីហា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា ការអភិវឌ្ឍវិស័យសំណង់ នៅកម្ពុជាចាប់តាំងពីឆ្នាំ១៩៨៤មក សុទ្ធតែមានការចូលរួមចំណែកបញ្ចេញស្នាដៃយ៉ាងច្រើន ពីវិស្វករសំណង់ ពីស្ថាបត្យករ និងអ្នកបច្ចេកទេសជំនាញរបស់កម្ពុជាផ្នែកទឹក ភ្លើង ប្រព្រឹត្តិកម្មទឹកកខ្វក់ និងអគ្គិភ័យ ដើម្បីធ្វើឱ្យសម្រេចបាននូវអគារសាធារណៈ និងអគារឯកជនទូទៅ។ លោកបានលើកជាឧទាហរណ៍ជាក់ស្តែងដូចជា អគារវិមានសន្តិភាព សាងសង់ដោយវិស្វករខ្មែរ និងរចនាតាមបែបខ្មែរសម្រាប់ប្រើប្រាស់ជាការិយាល័យ នាយករដ្ឋមន្ត្រី និងជាកន្លែងប្រជុំអន្តរជាតិ។

លោកបានលើកឡើងថា ចំពោះអគារថ្មីៗ ដូចជា អគារគយ និងរដ្ឋាករកម្ពុជា អគារក្រសួងឧស្សាហកម្ម និងសិប្បកម្ម និងអគារក្រសួងដែនដីជាដើម ចំណែកឯ អគារពាណិជ្ជកម្មឯកជនវិញ មានដូចជា អគារវឌ្ឍនៈ អគារកាណាឌីយ៉ា និងខុនដូថ្មីៗជាច្រើន ដែលទាំងអស់នេះសុទ្ធតែមានការចូលរួម សាងសង់ដោយវិស្វករខ្មែរ។

យ៉ាងណាក៏ដោយ លោករដ្ឋលេខាធិការទទួលស្គាល់ថា សមិទ្ធផលទាំងនេះ ក៏មានការចូលរួមចំណែកពីស្ថាបត្យករ និងវិស្វករបរទេសផងដែរ។ បើតាមលោក ឡៅ ទិព្វសីហា បានគូសបញ្ជាក់ថា វិស្វករ និងស្ថាបត្យករខ្មែរ មានសមត្ថភាពចូលរួមចំណែកក្នុងការ អភិវឌ្ឍវិស័យសំណង់អគារទំនើបៗ មិនចាញ់វិស្វករ និងស្ថាបត្យករបរទេសឡើយ៕

ប្រភព៖ AKP ប្រែសម្រួល៖ សំភី