សម្តេច ហ៊ុន សែន៖ ការដក ឬមិនដក EBA គឺមិនធ្វើឱ្យកម្ពុជា ស្លាប់ ឬក្លាយជាអ្នកមាននោះទេ

2019-02-14 09:38:04
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

សម្តេចនាយករដ្ឋមន្រ្តី ហ៊ុន សែន បានបញ្ជាក់ថា ការដក ឬមិនដកប្រព័ន្ធអនុគ្រោះពន្ធក្រោមកម្មវិធី «គ្រប់មុខទំនិញលើកលែងតែអាវុធ (EBA)» របស់សហភាពអឺរ៉ុប គឺមិនបានធ្វើឱ្យកម្ពុជាស្លាប់ ឬក្លាយជាអ្នកមាននោះទេ។ ការថ្លែងនេះ ធ្វើឡើងក្នុងពិធីបិទសន្និបាតបូកសរុបការងាររបស់ក្រសួងមហាផ្ទៃ នារសៀលថ្ងៃទី១៤ ខែកុម្ភៈ ឆ្នាំ២០១៩។

សម្តេច ហ៊ុន សែន ថ្លែងក្នុងសន្និបាតបូកសរុបការងារក្រសួងមហាផ្ទៃ នាថ្ងៃទី១៤កុម្ភ: ២០១៩

សម្តេចលើកឡើងថា យូរ ឬឆាប់ ប្រព័ន្ធ EBA គង់តែត្រូវបាត់បង់ នៅពេលសេដ្ឋកិច្ចកម្ពុជា ដើរដល់ដំណាក់កាលណាមួយនោះ គ្រាន់តែពីមុនធ្លាប់ចំណេញច្រើន តែក្រោយពេលដក EBA គឺចំណេញតិចតែប៉ុណ្ណោះ ហើយត្រូវកែប្រែបញ្ហាប្រឈមនេះ ទៅជាឱកាស។

សម្តេចពន្យល់ថា ការរកស៊ី គឺមានការបង់ពន្ធឱ្យគ្នាទៅវិញទៅមក ស្មើភាព និងសមហេតុសមផល តែមិនអាចបញ្ជាឱ្យកម្ពុជា ធ្វើតាមចិត្តចង់របស់គេនោះទេ។ «មិនអាចយកអធិបតេយ្យភាព ដូរយកជំនួយអ្នកណាទាំងអស់»។

ជាមួយគ្នានេះ ប្រមុខរាជរដ្ឋាភិបាលក៏អំពាវនាវកុំឱ្យប្រជាពលរដ្ឋ មន្រ្តីរាជការ និងកម្មករ មានការបារម្ភចំពោះបញ្ហា EBA នេះ។ «ប្រសិនបើកម្មករនៅតែមានការងារធ្វើ មានប្រាក់ខែ កុំខ្វល់ថា អ្នកណានិយាយអំពីអ្វី»។ ចំពោះប្រាក់ខែរបស់មន្រ្តីរាជការវិញ សម្តេចបញ្ជាក់ថា គ្រាន់តែចំណូលពន្ធគយមួយ គឺគ្រប់គ្រាន់សម្រាប់បើកប្រាក់ខែ។

យ៉ាងណាក៏ដោយ សម្តេច ហ៊ុន សែន អះអាងថា បញ្ហា EBA នឹងមិនធ្វើឱ្យកម្ពុជា និងអឺរ៉ុប កាត់ផ្តាច់ទំនាក់ទំនងគ្នាឡើយ ពោលគឺនឹងបន្តពិភាក្សាគ្នា ពិសេសគឺសម្រេចកិច្ចការរួមគ្នា នៅក្នុងកិច្ចប្រជុំកំពូលអាស៊ីអឺរ៉ុប ដែលកម្ពុជាធ្វើជាម្ចាស់ផ្ទះក្នុងឆ្នាំ២០២០ខាងមុខនេះ ហើយក្រុមហ៊ុនអឺរ៉ុប នៅតែបន្តរកស៊ីនៅកម្ពុជាដូចធម្មតា។

សូមជម្រាបថា ដំណើរការនីតិវិធីរបស់សហភាពអឺរ៉ុប ក្នុងការឈានដល់ការព្យួរជាបណ្តោះអាសន្ននូវប្រព័ន្ធអនុគ្រោះ EBA ពីកម្ពុជា គឺមានរយៈពេល ១៨ខែ គិតចាប់ពីថ្ងៃទី១២ ខែកុម្ភៈ ឆ្នាំ២០១៩៕

អត្ថបទ៖ សំភី