កម្ពុជា ខាតបង់ជាង ៣៥ដុល្លារក្នុងមួយតោន ពីការលក់អំបិលនាំចូលពីចិន

2019-02-15 01:51:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

អំបិលនាំចូលពីប្រទេសចិន ចំនួន ១ម៉ឺនតោនកន្លងទៅថ្មីៗនេះ ត្រូវបានប្រធានសមាគមអំបិលកម្ពុជាបង្ហើបថា បានលក់ខាត ៣៥ដុល្លារក្នុងមួយតោន ដើម្បីសម្រុកលក់ឲ្យអស់ពីឃ្លាំង ដោយសារគេប្រញាប់យកឃ្លាំងវិញ (ខ្ចីឃ្លាំងគេដាក់)។

លោក ប៊ុន បារាំង សហប្រធានសមាគមអំបិលកម្ពុជា បានឲ្យដឹងថា រដូវប្រាំងឆ្នាំ២០១៩នេះ ក្តៅខ្លាំង បានអំណោយផលដល់អំបិល ផលិតបាននូវគ្រប់ស្រែទាំងអស់ ហើយកសិករកំពុងទទួលបានផលខ្លះៗហើយ។ កសិករកំពុងមមាញឹកធ្វើអំបិលនៅពាសពេញវាលស្រែ។

លោកសហប្រធានប្រាប់ទៀត មិនបានប្រាប់ចំនួនផលអំបិល ដែលទទួលបាននោះទេ មកដល់ពេលនេះ។ រហូតដល់ខែមិថុនា ទើបដឹងចំនួនអំបិលប្រមូលបានពិតប្រាកដ។ ក៏ប៉ុន្តែទោះជាយ៉ាងណា លោកសង្ឃឹមថា ឆ្នាំនេះ កម្ពុជាលែងនាំចូលពីបរទេសទៀតហើយ។

លោក សុក គឹមជឿម ប្រធានមន្ទីរឧស្សាហកម្ម និងសិប្បកម្មខេត្តកំពត ធ្លាប់ឲ្យដឹងថា បញ្ហាស្រែអំបិលនេះ មន្ទីរកំពុងព្រួយបារម្ភទៅអនាគត ទៅលើការប្រឈមនូវហានិភ័យ៣។ ១ អាចផលិតមិនបានដោយអាកាសធាតុប្រែប្រួល, ២ អាចខ្វះពលកម្មផលិត, ៣ ប្រឈមទៅនឹងស្ថានការណ៍សេដ្ឋកិច្ចផ្លាស់ប្ដូរ តម្លៃអចលនទ្រព្យប្រែប្រួល ស្រែអំបិលជិត ៤០០០ហិកតា អាចរបូតធ្លាក់ក្នុងដៃទីផ្សារដីធ្លី ដែលកំពុងតែពុះកញ្ជ្រោលរាល់ថ្ងៃ ដូចករណីខេត្តព្រះសីហនុ។

សូមជម្រាបថា នាពេលកន្លងទៅ ដោយកសិករខកខានមិនបានផលិត ជាហេតុធ្វើឲ្យកម្ពុជាខ្វះអំបិលបរិភោគ បង្ខំចិត្តនាំអំបិលពីបរទេសមកបរិភោគវិញ ដែលមិនធ្លាប់ឡើយ៕

ប្រភព៖ រស្មីកម្ពុជា ប្រែសម្រួល៖ លាភ.