សង្គ្រាម សម្លាប់កុមារជាង ១សែននាក់ក្នុងមួយឆ្នាំ

2019-02-15 02:56:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យ៉ាងហោចណាស់ កុមារ ១សែននាក់ បានស្លាប់ជារៀងរាល់ឆ្នាំ ដោយសារសង្គ្រាម និងផលប៉ះពាល់របស់វា រួមផ្សំនឹងកត្តាភាពអត់ឃ្លាន និងកង្វះជំនួយ។ នេះបើយោងតាមរបាយការណ៍របស់អង្គការ Save the Children International នៅថ្ងៃទី១៥ ខែកុម្ភៈ ឆ្នាំ២០១៩នេះ។

របាយការណ៍ឲ្យដឹងថា ប្រទេសចំនួន១០ ដែលរងផលប៉ះពាល់ខ្លាំងជាងគេដោយសារសង្គ្រាម មានកុមារស្លាប់ប្រហែល ៥សែន ៥ម៉ឺននាក់ គិតចាប់ពីឆ្នាំ២០១៣ ដល់ ២០១៧។ សង្គ្រាម បានបណ្ដាលឲ្យខូចខាតមន្ទីរពេទ្យ ហេដ្ឋារចនាសម្ព័ន្ធ ធ្វើឲ្យកង្វះការទទួលបានការគាំពារសុខភាព អនាម័យ ជំនួយផ្សេងៗ និងបង្កភាពអន់ឃ្លាន។

ប្រភពបន្តថា កុមារទទួលរងការគំរាមកំហែង សម្លាប់ ឬ ត្រូវពិការ ឬ ត្រូវបានក្រុមជនអាក្រក់ចាប់ខ្លួន បង្រៀនឲ្យកាន់អាវុធធ្វើសង្គ្រាម និងត្រូវរងទារុណកម្មផ្លូវភេទជាដើម។

របាយការណ៍របស់ Save the Children ដែលត្រូវបានសិក្សាដោយវិទ្យាស្ថាន Peace Research នៅក្រុង Oslo បានរកឃើញថា ក្នុងឆ្នាំ២០១៧ កុមារជាង ៤២០លាននាក់ កំពុងរស់នៅក្នុងប្រទេសដែលមានជម្លោះ សង្គ្រាម។ តួលេខនេះ ស្មើនឹង ១៨ភាគរយ នៃចំនួនកុមារសរុប នៅទូទាំងពិភពលោក ឬកើនឡើង ៣០លាននាក់ បើធៀបទៅនឹងឆ្នាំ២០១៦។

ប្រទេសដែលមានផលប៉ះពាល់ដោយសារសង្គ្រាមខ្លាំងបំផុតទាំង១០ មានដូចជា អាហ្វហ្គានីស្ថាន សាធារណរដ្ឋអាហ្វ្រិកកណ្ដាល សាធារណរដ្ឋប្រជាធិបតេយ្យកុងហ្គោ អ៊ីរ៉ាក់ ម៉ាលី នីហ្សេរីយ៉ា សូម៉ាលី ស៊ូដង់ខាងត្បូង ស៊ីរី និង យេមែន៕