ក្រុមហ៊ុន១ ដាក់ទុន ៧០លានដុល្លារ វិនិយោគលើអាងចិញ្ចឹមត្រី និងជម្រកសត្វជិតផុតពូជ នៅកម្ពុជា
- 2019-02-18 09:39:35
- ចំនួនមតិ 0 | ចំនួនចែករំលែក 0
ក្រុមហ៊ុន១ ដាក់ទុន ៧០លានដុល្លារ វិនិយោគលើអាងចិញ្ចឹមត្រី និងជម្រកសត្វជិតផុតពូជ នៅកម្ពុជា
ចន្លោះមិនឃើញ
ក្រុមហ៊ុន អង្គរ វ៉ាយដ៏ឡាយហ្វ៍ និង អីឃ្វារៀម បានវិនិយោគលើជលវប្បដ្ឋាន(អាងចិញ្ចឹមត្រី) ត្រីទឹកសាប និងទឹកប្រៃ ព្រមទាំងជម្រកអភិរក្សសត្វជិតផុតពូជ នៅភូមិក្បូន ឃុំខ្ចាស់ ស្រុកសូទ្រនិគម ខេត្តសៀមរាប។ គម្រោងនេះ ត្រូវបានបង្ហាញដោយលោក Roger Reynolds ក្រុមប្រឹក្សាភិបាលនៃក្រុមហ៊ុននេះ ទៅកាន់លោក ទៀ សីហា អភិបាលខេត្តសៀមរាប ក្នុងជំនួបពិភាក្សាគ្នាមួយ នាព្រឹកថ្ងៃទី១៨ ខែកុម្ភៈ ឆ្នាំ២០១៩។
លោកបញ្ជាក់ថា គម្រោងនេះ ត្រូវចែកចេញជាបីដំណាក់កាល ហើយក្នុងដំណាក់កាលទី១នេះ ប្រើប្រាស់ថវិកា ២០លានដុល្លារ ដែលនឹងគ្រោងបើកការដ្ឋាន ក្នុងខែមីនា ឆ្នាំ២០១៩ ខាងមុខនេះ ហើយនឹងបើកឲ្យដំណើរការនៅចុងឆ្នាំ២០២០។ ក្នុងគម្រោងនៃដំណាក់ការទី១នេះ ក៏ជាការត្រៀម ធ្វើការទាក់ទាញភ្ញៀវទេសចរជាតិ អន្តរជាតិ ឱ្យបន្តស្នាក់នៅខេត្តសៀមរាប។
លោកបន្ថែមថា គម្រោងនេះ គឺមិនត្រឹមតែធ្វើការអភិវឌ្ឍសេដ្ឋកិច្ចជាតិប៉ុណ្ណោះទេ គឺ ផ្តល់នូវការអប់រំដល់ភ្ញៀវជាតិ អន្តរជាតិ និងប្រជាពលរដ្ឋ អំពីបរិស្ថាន និងការអភិរក្សប្រភពធនធានធម្មជាតិ តាមរយៈការបង្ហាញនូវរូបភាពឯកសារ អំពីប្រភេទមច្ឆាក្នុងទឹកដ៏កម្រ ដល់សិស្ស និសិ្សត និង ប្រជាពលរដ្ឋ សំខាន់ភ្ញៀវទេសចរបរទេស បានទស្សនាសិក្សាស្វែងយល់ អំពីធនធានធម្មជាតិនៅកម្ពុជា ។
ក្នុងជំនួបនេះ លោក ទៀ សីហា បានលើកឡើងថា គម្រោងនេះគឺជាសមិទ្ធផលថ្មីមួយរបស់ខេត្តសៀមរាប ដែលទន្ទឹងរង់ចាំជាយូរមកហើយ ក្នុងការបម្រើនូវសេចក្តីត្រូវការ របស់ភ្ញៀវទេសចរជាតិ អន្តរជាតិ និងការបង្កើននូវការស្នាក់នៅក្រុងសៀមរាប បានយូរថ្ងៃផងដែរ។
ក្នុងនោះដែរ លោកអភិបាលខេត្តក៏បានធ្វើការណែនាំមួយចំនួន ព្រមទាំងលើកនូវមតិល្អៗដល់ក្រុមហ៊ុន គឺ ស្នើឱ្យក្រុមហ៊ុន ធ្វើកិច្ចសហការជាមួយបណ្តាមន្ទីរ អង្គភាព និងអាជ្ញាធរពាក់ព័ន្ធ ហើយកត្តាសំខាន់នោះ គឺការធ្វើពាក្យសុំច្បាប់សាងសង់ឲ្យបានត្រឹមត្រូវជាមុន ព្រមទាំងធ្វើការត្រួតពិនិត្យឡើងវិញ នូវទីតាំងរបស់គម្រោង អំពីទីទួលបុរាណដ្ឋាន ដើមី្បជៀសវាងការរំខានណាមួយ ក្នុងពេលកំពុងដំណើរការសាងសង់ ជាហេតុធ្វើឲ្យមានការយឺតយ៉ាវរបស់គម្រោងនេះ៕