ONE Championship៖ ខុន ស៊ីចាន់ តាំងចិត្តខ្ពស់ ទោះគូប្រកួតជាកីឡាករខ្លាំងខាងក្បាច់ MMA

2019-02-20 05:40:08
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កីឡាករគុនខ្មែរ ខុន ស៊ីចាន់ តាំងចិត្តថានឹងបញ្ចេញឲ្យអស់សមត្ថភាព ពេលប៉ះកីឡាករឥណ្ឌូណេស៊ី Rudy Agustian នៅក្នុងព្រឹត្តិការណ៍ ONE: CALL TO GREATNESS របស់ ONE Champoinship នៅប្រទេសសិង្ហបុរី នាថ្ងៃសុក្រ ទី២២ ខែកុម្ភៈខាងមុខនេះ។

ខុន ស៊ីចាន់ ជាមួយខ្សែក្រវាត់ Khmer Warrior Challenge (KWC)

ទោះខកខានប្រកួតយុទ្ធគុនចម្រុះ (MMA) ជិត១ឆ្នាំហើយក៏ដោយ ក៏ ខុន ស៊ីចាន់ បានអះអាងថាខ្លួននៅមានស្មារតីល្អ ហើយរឹតតែមានទំនុកចិត្តខ្ពស់ ដោយសារបានហ្វឹកហាត់ត្រៀមជាមួយគ្រូបង្វឹកជំនាញៗ ក៏ដូចជាជាមួយកីឡាករលំដាប់ខ្ពស់របស់កម្ពុជាផងដែរ។

ស៊ីចាន់ ប្រាប់មុនពេលទៅប្រកួតថា៖ "ជិតដល់ថ្ងៃទៅប្រកួតនៅសិង្ហបុរី ខ្ញុំត្រៀមខ្លួនអស់ហើយ ទាំងការហាត់បច្ចេកទេស និងកម្លាំងទាំងអស់។ ខ្ញុំត្រៀមខ្លួនប្រឹងឲ្យអស់ពីសមត្ថភាព អត់ខ្លាចគេទេ"។

កីឡាករមកពីខេត្តឧត្តរមានជ័យរូបនេះ តែងធ្វើដំណើរមកបោះជំរុំហ្វឹកហាត់ប្រដាល់នៅរាជធានីភ្នំពេញ ដើម្បីបានហាត់រៀនជាមួយគ្រូបង្វឹកជនជាតិស្កុតឡែន លោក Alan Mccune នៅក្លឹប Phnom Penh MMA។

ខុន ស៊ីចាន់ ជាមួយគ្រូបង្វឹកស្កុតឡែន Alan Mccune

ស៊ីចាន់ បានបន្ថែមថា៖ "រាល់ថ្ងៃ ខ្ញុំខំហាត់ខ្លាំងជាងគេគឺក្បាច់ប្រដាល់សេរី ខ្ញុំចេះច្រើនហើយ តែគូប្រកួតរបស់ខ្ញុំលើកនេះ គឺគេល្អក្បាច់ MMA អីចឹងខ្ញុំហាត់ MMA ការពារហើយ។ ខ្ញុំនឹងវាយសេរីច្រើនជាង ដើម្បីកុំឲ្យគេចូលប្រើក្បាច់ MMA បាន"។

ខុន ស៊ីចាន់ ក៏បានបញ្ជាក់ដែរថា ក្រៅពីហាត់ជាមួយលោក Alan ខ្លួនក៏បានហាត់ក្បាច់ក្លេរពីលោក Fernando Salvador ជើងខ្លាំងខ្សែក្រវាត់ខ្មៅក្បាច់ក្លេ ជីជីតស៊ូ ដែលមានប្រវត្តិបង្ហាត់ក្លាច់ក្លេ ជិត ៣០ឆ្នាំមកហើយ។

ខុន ស៊ីចាន់ ជាមួយគ្រូបង្វឹកជំនាញក្លេ Fernando Salvador (ស្ដាំ)

ស៊ីចាន់ ធ្លាប់ប្រកួត MMA ៥ដង (ឈ្នះ ៣ដង ចាញ់ ២ដង) ប៉ុន្តែទើបប្រឡូកនៅ ONE Championship តែ២ដងប៉ុណ្ណោះ (ឈ្នះ ១ ចាញ់ ១)។ ប្រកួតចុងក្រោយស៊ីចាន់ ឈ្នះកីឡាករឥណ្ឌូណេស៊ី Riski Umar ដោយពិន្ទុ កាលពីខែមីនា ឆ្នាំ២០១៨។ ចំណែក Rudy Agustian ទើបប្រកួតនៅ ONE ២ដងដែរ ប៉ុន្តែឈ្នះទាំង២ ដង។ ប្រកួតចុងក្រោយកាលពីខែវិច្ឆិកា ឆ្នាំ២០១៨ កីឡាកររូបនេះ ឈ្នះកីឡាករបង់ក្លាដែស Asraful Islam ដោយពិន្ទុ។

សូមបញ្ជាក់ថា ស៊ីចាន់ និង Agustian ជាគូបើកឆាកព្រឹត្តិការណ៍ ONE: CALL TO GREATNESS។ ចំណែកកីឡាករគុនខ្មែរ១រូបទៀត គឺ គង់ សំបូរ ជាគូទី៤៕

អត្ថបទ៖ Matias, សុវត្ថិ