កីឡាករគុនខ្មែរ គង់ សំបូរ នឹងប្រកួតឲ្យកក្រើកសង្វៀន ONE Championship សិង្ហបុរី

2019-02-20 06:39:32
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

គង់ សំបូរ មកពីក្លឹប Kingdom Fight Gym ឬ អាណាចក្រប្រយុទ្ធក្នុងខេត្តសៀមរាប នឹងត្រូវបង្ហាញខ្លួនជាលើកដំបូងនៅសង្វៀនដ៏ធំ ONE Championship នៅសិង្ហបុរី នាថ្ងៃសុក្រ ទី២២ ខែកុម្ភៈ ដោយត្រូវប៉ះកីឡាករចិន Zhang Chenglong ក្នុងវិញ្ញាសាប្រដាល់សេរី Kickboxing។

លោក Kwok Leung Tsang ដែលជាម្ចាស់ក្លឹបអាណាចក្រប្រយុទ្ធ បាននិយាយមុនការប្រកួតនេះថា៖ "វាជាបទពិសោធន៍ដ៏អស្ចារ្យសម្រាប់គាត់ (គង់ សំបូរ)។ លើកទីមួយហើយដែលគាត់បានប្រកួតក្រៅប្រទេស ពីកម្ពុជាទៅសិង្ហបុរី ទឹកដីខុសគ្នាឆ្ងាយដូចមេឃ និងដី"។

មុនការប្រកួតខាងមុខនេះ ទាំងលោក Tsang លោកគ្រូបង្វឹកជា រិទ្ធិ និងកីឡាករគង់ សំបូរផ្ទាល់ សុទ្ធតែទទួលស្គាល់ថា កីឡាករចិន Zhang ជាកីឡាករល្អម្នាក់ ជាពិសេសជាកីឡាករដែលមានបទពិសោធន៍នៅសង្វៀនល្បី ដូចជា GLORY ជាដើម។

លោកគ្រូបង្វឹក ជា រិទ្ធ (ឆ្វេង) កីឡាករគង់ សំបូរ (កណ្ដាល) និងលោក Kwok Leung Tsang ប្រធានក្លឹបអាណាចក្រប្រយុទ្ធ ធ្វើដំណើរពីសៀមរាប ទៅសិង្ហបុរី

លោក Tsang បញ្ជាក់ថា៖ "Zhang ជាអ្នកប្រដាល់កាចសាហាវ និងចូលមិនចេះថយម្នាក់។ អ្នកទស្សនាគេចូលចិត្តអ្នកប្រយុទ្ធបែបអីចឹង ហើយនោះគឺអ្វីដែលយើងនឹងបង្ហាញ"។

លោកបញ្ជាក់ជាចុងក្រោយថា៖ "យើងមកនេះដើម្បីតំណាងឲ្យកម្ពុជា ហើយយើងនឹងប្រកួតឲ្យផ្ទុះឆាកតែម្តង"។

សូមបញ្ជាក់ថា គង់ សំបូរ មិនធ្លាប់មានប្រវត្តិប្រកួតនៅសង្វៀនអន្តរជាតិពីមុនមកទេ ប៉ុន្តែកីឡាកររូបនេះ ធ្លាប់ប្រកួតគុនខ្មែរ ៩២ដង (ឈ្នះ ៦៨ដង ចាញ់ ១៨ដង និងស្មើ ៦ដង)។ ចំណែកកីឡាករចិន Zhang Chenglong ធ្លាប់មានប្រវត្តិប្រកួតអន្តរជាតិជាច្រើនសង្វៀន ដែលមានប្រវត្តិប្រកួតឈ្នះ ៤៦ដង ចាញ់ ១២ដង និងស្មើម្ដង៕

អត្ថបទ៖ Matias, សុវត្ថិ