ប្រធានាធិបតីតៃវ៉ាន់ ប្រាប់ឲ្យយោធាត្រៀមខ្លួនធ្វើសង្គ្រាម

2019-02-20 06:42:35
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ថ្មីៗនេះ លោកស្រី Tsai Ing-wen ប្រធានាធិបតីតៃវ៉ាន់ បានថ្លែងថា លោកស្រីកំពុងពង្រឹងកម្លាំងយោធា ដើម្បីត្រៀមខ្លួនប្រឈមមុខនឹងសង្គ្រាមដែលមិនស្មើភាពមួយ ខណៈក្រុងប៉េកាំង កំពុងបង្កើនសកម្មភាពយោធាប្រឆាំងនឹងបំណងចង់ប្រកាសផ្ដាច់ខ្លួនរបស់តៃវ៉ាន់។

លោកស្រី Tsai Ing-wen ប្រធានាធិបតីតៃវ៉ាន់ ថ្លែងក្នុងកិច្ចសម្ភាសជាមួយ CNN ថ្មីៗនេះ (រូបថត៖ CNN)

ថ្លែងប្រាប់ក្នុងកិច្ចសម្ភាសជាមួយសារព័ត៌មាន CNN លោកស្រី Tsai Ing-wen បានថ្លែងដូច្នេះថា៖ «ពួកយើងត្រូវតែត្រៀមខ្លួនគ្រប់ពេលវេលា» សម្រាប់សង្គ្រាមដែលមិនស្មើភាពនេះ។ លោកស្រីបន្តថា តៃវ៉ាន់កំពុងប្រឈមមុខនឹងការគំរាមកំហែងកាន់តែខ្លាំងពីក្រុងប៉េកាំង ដែលបង្កការលំបាកដើម្បីការពារឯករាជ្យ សន្តិសុខ វិបុលភាព និង ប្រជាធិបតេយ្យរបស់ខ្លួន។

ថ្មីៗនេះ ចិន បានដាក់សម្ពាធលើតៃវ៉ាន់ទាំងផ្នែកការទូត និងសេដ្ឋកិច្ច ដោយធ្វើសមយុទ្ធបាញ់គ្រាប់ពិតចំនួន៥លើក និងបញ្ជូនយន្តហោះទម្លាក់គ្រាប់បែក H-6K ព្រមទាំងយន្តហោះស៊ើបការណ៍ ហោះឆ្វែលកោះមួយនេះ។

កោះតៃវ៉ាន់ ដែលមានប្រជាជនប្រមាណ ២៣លាននាក់ ស្ថិតនៅចម្ងាយប្រមាណជា ១៣០គីឡូម៉ែត្រពីចិនដីគោក។ រដ្ឋាភិបាលក្រុងប៉ាកាំង របស់លោកប្រធានាធិបតី ស៊ី ជិនពីង ចង់ឲ្យមានការបង្រួបបង្រួមគ្នាតែមួយ ដោយនយោបាយ "ប្រទេសមួយ ប្រព័ន្ធពីរ"៕

ប្រភព៖ CNN ប្រែសម្រួល៖ លាភ.