អ៊ីស្រាអែល ជិតក្លាយជាមហាអំណាចអវកាសទី៤ហើយ ដែលបញ្ជូនយានទៅដល់ភពព្រះចន្ទ
- 2019-02-20 08:25:48
- ចំនួនមតិ 0 | ចំនួនចែករំលែក 0
អ៊ីស្រាអែល ជិតក្លាយជាមហាអំណាចអវកាសទី៤ហើយ ដែលបញ្ជូនយានទៅដល់ភពព្រះចន្ទ
ចន្លោះមិនឃើញ
អ៊ីស្រាអែល សង្ឃឹមថា នឹងក្លាយជាប្រទេសទី៤ក្នុងពិភពលោក ដែលបានទៅដល់ភពព្រះចន្ទ តាមរយៈការដាក់យានអវកាសអង្កេតគ្មានមនុស្សបើកមួយឈ្មោះ «Beresheet» នៅលើផ្ទៃដីនៃភពនេះ។
យានអវកាសនេះ នឹងត្រូវបាញ់បង្ហោះតាមរយៈគ្រាប់រ៉ុកកែត Falcon 9 របស់ក្រុមហ៊ុន Space X ចេញពីមជ្ឈមណ្ឌល Cape Canaveral រដ្ឋ Florida សហរដ្ឋអាមេរិក នាថ្ងៃទី២២ ខែកុម្ភៈ ឆ្នាំ២០១៩។ Beresheet មានទម្ងន់ត្រឹមតែ១៦០គីឡូក្រាមប៉ុណ្ណោះជាមួយតម្លៃត្រឹម ១០០លានដុល្លារ បានធ្វើឱ្យវាក្លាយជាយានដែលតូច និងថោកជាងគេបំផុត ដែលបានទៅដល់ព្រះចន្ទ ប្រសិនបើការបាញ់បង្ហោះនេះ ទទួលបានជោគជ័យ។
សូមជម្រាបថា មកដល់ពេលនេះ មានតែប្រទេស៣ប៉ុណ្ណោះដែលបានបញ្ជូនយានអវកាសទៅដល់ផ្ទៃដីភពព្រះចន្ទ រួមមាន សហរដ្ឋអាមេរិក រុស្ស៊ី (អតីតសហភាពសូវៀត) និងចិន។
ការបង្កើតយានអវកាសនេះ គឺក្រោមកិច្ចសហការរួមគ្នារវាងក្រុមហ៊ុនឯកជន SpaceIL និងក្រុមហ៊ុនរដ្ឋ Israel Aerospace Industries ប៉ុន្តែក្រុមហ៊ុន SpaceIL គឺជាផ្តល់មូលនិធិស្ទើរតែទាំងស្រុង។
លោក Ido Anteby នាយកប្រតិបត្តិក្រុមហ៊ុន SpaceIL បានឱ្យដឹងថា យានអវកាស Beresheet នឹងត្រូវចំណាយពេលប្រមាណជិត ២ខែ ទើបទៅដល់ភពព្រះចន្ទ ពោលគឺអាចទៅដល់នៅក្នុងអំឡុងថ្ងៃទី១១ ខែមេសា ឆ្នាំ២០១៩។ វានឹងចុះចតលើផ្ទៃដីភពនោះ នៅចន្លោះទីតាំងបេសកកម្មអាប៉ូឡូទី១២ និងអាប៉ូឡូទី១២ របស់អង្គការណាសា សហរដ្ឋអាមេរិក ដែលបានទៅដល់កាលពីឆ្នាំ១៩៦៩-១៩៧១។
តាមរយៈទិន្នន័យដែលប្រមូលបានដោយយាន Beresheet នៅលើភពព្រះចន្ទ នឹងជួយដល់អ្នកវិទ្យាសាស្រ្ត ក្នុងការសិក្សាស្វែងយល់បន្ថែមពីរបៀបនៃការកកើតឡើងនូវភពនេះ កាលពីរាប់លានឆ្នាំមុន៕