រាជរដ្ឋាភិបាល បង្កើតគណៈកម្មការរៀបចំទីតាំងគម្រោងសាងសង់ព្រលានយន្តហោះថ្មីហើយ
- 2019-02-21 02:24:06
- ចំនួនមតិ 0 | ចំនួនចែករំលែក 0
រាជរដ្ឋាភិបាល បង្កើតគណៈកម្មការរៀបចំទីតាំងគម្រោងសាងសង់ព្រលានយន្តហោះថ្មីហើយ
ចន្លោះមិនឃើញ
រាជរដ្ឋាភិបាលកម្ពុជា បានសម្រេចបង្កើតគណៈកម្មការរៀបចំទីតាំងគម្រោងសាងសង់អាកាសយានដ្ឋានអន្តរជាតិភ្នំពេញថ្មី ដែលមានលោកឧបនាយករដ្ឋមន្រ្តី ជា សុផារ៉ា រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ជាប្រធាន និងលោក ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋានអាកាសចរស៊ីវិល ជាអនុប្រធាន។ នេះបើតាមសេចក្តីសម្រេចចុះកាលពីថ្ងៃទី១៨ ខែកុម្ភៈ ឆ្នាំ២០១៩ ឆ្នាំ២០១៩ ដោយសម្តេចនាយករដ្ឋមន្រ្តី ហ៊ុន សែន។
-ពិនិត្យ និងកំណត់និយាមកាទីតាំងសម្រាប់គម្រោងសាងសង់អាកាសយានដ្ឋានអន្តរជាតិភ្នំពេញថ្មី
-សិក្សាវាយតម្លៃថ្លៃដីនៅតំបន់គម្រោងសាងសង់អាកាសយានដ្ឋានអន្តរជាតិភ្នំពេញថ្មី
-សម្របសម្រួលដោះស្រាយបញ្ហាពាក់ព័ន្ធនឹងទីតាំងដី ដើម្បីបង្កលក្ខណៈដល់ដំណើរការគម្រោងសាងសង់អាកាសយានដ្ឋានអន្តរជាតិភ្នំពេញថ្មី
-សម្របសម្រួលជាមួយក្រសួង ស្ថាប័ន និងអង្គភាពពាក់ព័ន្ធរបស់រាជរដ្ឋាភិបាល និងក្រុមហ៊ុន ដើម្បីដំណើរការអនុវត្តគម្រោងប្រព្រឹត្តទៅដោយជោគជ័យ
-ផ្តល់អនុសាសន៍ដល់ក្រុមហ៊ុនក្នុងការបំពេញបែបបទផ្សេងៗ ដើម្បីឆ្លើយតបបានតាមតម្រូវការសម្រាប់ការអនុវត្តគម្រោង
-ពិនិត្យ និងផ្តល់យោបល់ លើផែនការមេរបស់គម្រោង ក៏ដូចជាសំណូមពរផ្សេងៗរបស់ក្រុមហ៊ុន
-តាមដាន និងត្រួតពិនិត្យការអនុវត្តគម្រោងសាងសង់អាកាសយានដ្ឋានអន្តរជាតិភ្នំពេញថ្មី និងហេដ្ឋារចនាសម្ព័ន្ធពាក់ព័ន្ធ
-ធ្វើរបាយការណ៍អំពីលទ្ធផលជូននាយកដ្ឋមន្ត្រី ដើម្បីពិនិត្យ និងសម្រេច
-បំពេញភារកិច្ចផ្សេងទៀត ដែលនាយករដ្ឋមន្រ្តីប្រគល់ជូន។
សូមរំលឹកថា រាជរដ្ឋាភិបាលកម្ពុជា បានឯកភាពចំពោះសំណើសាងសង់អាកាសយានដ្ឋានអន្តរជាតិលំដាប់ថ្នាក់ 4F របស់ក្រុមហ៊ុន Cambodia Airport Investment Co., Ltd ដែលមានទីតាំងស្ថិតនៅក្រុងតាខ្មៅ និងស្រុកកណ្តាលស្ទឹង ខេត្តកណ្តាល លើទំហំដីចំនួន ២៦០០ហិកតា។ គម្រោងនេះ គឺក្រោមទុនវិនិយោគសរុប ១៥០០លានដុល្លារ ដែលបានមកពី៖ កម្ចីធនាគារបរទេស ១១០០លានដុល្លារ កម្ចីពីភាគទុនរបស់ក្រុមហ៊ុន OCIC ចំនួន ២៨០លានដុល្លារ និងដើមទុនចុះបញ្ជី ១២០លានដុល្លារ។ នេះបើតាមលិខិតរបស់ទីស្តីការគណៈរដ្ឋមន្រ្តី ផ្ញើទៅកាន់ក្រសួងសេដ្ឋកិច្ច និងហិរញ្ញវត្ថុ និងរដ្ឋលេខាធិការដ្ឋានអាកាសចរស៊ីវិល កាលពីថ្ងៃទី២១ ខែធ្នូ ឆ្នាំ២០១៧៕