ពូទីន ព្រមានបាញ់ បើអាមេរិកបញ្ជូនមីស៊ីល១ប្រភេទទៅ អឺរ៉ុប
- 2019-02-21 03:53:07
- ចំនួនមតិ 0 | ចំនួនចែករំលែក 0
ពូទីន ព្រមានបាញ់ បើអាមេរិកបញ្ជូនមីស៊ីល១ប្រភេទទៅ អឺរ៉ុប
ចន្លោះមិនឃើញ
លោកប្រធានាធិបតីរុស្ស៊ី វ្ល៉ាឌឺមៀ ពូទីន កាលពីថ្ងៃទី២០ ខែកុម្ភៈ ឆ្នាំ២០១៩ បានព្រមានថា រុស្ស៊ីនឹងតម្រង់កាណុងដាក់ សហរដ្ឋអាមេរិក ប្រសិនបើក្រុងវ៉ាស៊ីនតោន បញ្ជូនមីស៊ីលរយៈចម្ងាយមធ្យម (ICBM) របស់ខ្លួនទៅកាន់ទ្វីបអឺរ៉ុប។ ការព្រមាននេះ ធ្វើឡើងក្រោយអាមេរិក ដកខ្លួនពីសន្ធិសញ្ញាស្ដីពីអាវុធនុយក្លេអ៊ែរ Intermediate-Range Nuclear Forces Treaty (INF) កាលពីពេលថ្មីៗនេះ។
ថ្លែងក្នុងពិធីសន្ទរកថាប្រចាំឆ្នាំមួយ លោក ពូទីន ជំរុញឲ្យមេដឹកនាំអាមេរិក គិតដល់អាវុធរបស់រុស្ស៊ី មុននឹងធ្វើការសម្រេចចិត្តលើអ្វីមួយ។ «វាជាសិទ្ធិរបស់ពួកគេ ក្នុងការគិត។ ប៉ុន្តែតើពួកគេអាចគណនាបានទេ? ខ្ញុំសង្ឃឹមថា ពួកគេអាច។ អ៊ីចឹងឲ្យពួកគេគណនាពីចម្ងាយ និងល្បឿនរបស់អាវុធពួកយើងសាកមើលទៅ»។
ក្នុងពិធីនោះដែរ លោកប្រធានាធិបតីរុស្ស៊ី បានធ្វើការបង្ហាញនូវមីស៊ីលថ្មី Zircon ដែលមានល្បឿនលឿនជាងសំឡេង ៩ដង និងអាចបាញ់ទៅលើគោលដៅដែលមានចម្ងាយ ១ពាន់គីឡូម៉ែត្រ។ លោកពូទីន បញ្ជាក់ថា លោកនឹងមិនបញ្ជូនមីស៊ីល ICBM ទៅកាន់អឺរ៉ុបនោះទេ ព្រោះមិនស្របតាមសន្ធិសញ្ញា INF ហើយលោកមិនចង់មានការប្រឈមមុខដាក់គ្នា ជាពិសេសសហរដ្ឋអាមេរិក។
សូមជម្រាបថា ក្រោយការបញ្ចប់សន្ធិសញ្ញា INF ទាំងសហរដ្ឋអាមេរិក និងរុស្ស៊ី បានព្រមានអំពីការអភិវឌ្ឍអាវុធថ្មីៗ រៀងៗខ្លួន។
សហរដ្ឋអាមេរិក កាលពីថ្ងៃទី២១ ខែមករា ឆ្នាំ២០១៩ បានទាមទារឲ្យរុស្ស៊ី កម្ទេចចោលនូវប្រព័ន្ធមីស៊ីលថ្មី ដែលខ្លួនចាត់ទុកជាការរំលោភលើសន្ធិសញ្ញា INF និងប៉ះពាល់ដល់សន្តិសុខសាកលលោក៕
អត្ថបទទាក់ទង អាមេរិក ចង់ឲ្យរុស្ស៊ី កម្ទេចចោលប្រព័ន្ធមីស៊ីលថ្មីរបស់ខ្លួន