ជប៉ុន សម្រេចការចុះចតលើអាចម៌ផ្កាយមួយ ដែលមានចម្ងាយជាង ៣០០លានគីឡូម៉ែត្រពីផែនដី

2019-02-22 02:11:18
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

យានអវកាសអង្កេតជប៉ុន Hayabusa2 បានសម្រេចការចុះចតហើយលើផ្ទៃដីអាចម៌ផ្កាយមួយឈ្មោះ Ryugu។ នេះបើតាមការប្រកាសរបស់ភ្នាក់ងាររុករកអវកាសជប៉ុន (JAXA) នៅព្រឹកថ្ងៃទី២២ ខែកុម្ភៈ ឆ្នាំ២០១៩នេះ។

អាចម៌ផ្កាយ Ryugu មានទំហំប្រមាណ ៩០០ម៉ែត្រ និងមានចម្ងាយ ៣៤០លានគីឡូម៉ែត្រពីផែនដី។ បេសកកម្មរបស់យានអវកាសជប៉ុន គឺប្រមូលយកគំរូនានានៅលើអាចម៌ផ្កាយនេះ ដើម្បីសិក្សាពីប្រភពដើមនៃការកកើតឡើងនូវជីវិតនៅលើផែនដីនេះ។

យានអវកាស Hayabusa2 បានទៅដល់អាចម៌ផ្កាយនេះ (មិនទាន់ចុះចត) កាលពីខែមិថុនា ឆ្នាំ២០១៨ បន្ទាប់ពីធ្វើដំណើរចេញពីផែនដី ប្រមាណ ៣ឆ្នាំកន្លះមក។ យាននេះ ត្រូវបានរំពឹងថា នឹងត្រឡប់មកផែនដីវិញ ជាមួយនឹងគំរូដែលវាប្រមូលបាន នៅក្នុងឆ្នាំ២០២០។

ភ្នាក់ងារ JAXA កាលពីដំបូងគ្រោងនឹងដាក់យានអវកាសនេះ ចុះចតលើអាចម៌ផ្កាយ Ryugu តាំងពីខែតុលា ឆ្នាំ២០១៨ ប៉ុន្តែផ្ទៃដីអាចម៌ផ្កាយនេះ មានសភាពលំបាកក្នុងការចុះចតជាងការរំពឹងទុក ពោលគឺមានដុំថ្មធំៗច្រើន ដែលធ្វើឱ្យយាននេះពិបាកស្វែងរកទីតាំងចុះចត និងប្រមូលគំរូ ជាហេតុធ្វើឱ្យការចុះចតត្រូវពន្យារពេលរហូតមកដល់ពេលនេះ៕