ក្រសួងមហាផ្ទៃ ចេញសេចក្តីណែនាំអំពីការស្នើសុំនីតិសម្បទាធ្វើនយោបាយឡើងវិញ

2019-02-22 03:54:21
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រសួងមហាផ្ទៃ បានចេញសេចក្តីណែនាំស្តីពីបែបបទ និងនីតិវិធី នៃការស្នើសុំនីតិសម្បទាធ្វើនយោបាយឡើងវិញ កាលពីថ្ងៃទី២១ ខែកុម្ភៈ ឆ្នាំ២០១៩។ ក្នុងសេចក្តីណែនាំនេះ បានឲ្យដឹងថា យោងតាមមាត្រា៤៥ថ្មី (ស្ទួនមួយ) នៃច្បាប់ស្តីពីគណបក្សនយោបាយ បុគ្គលដែលត្រូវបានតុលាការហាមឃាត់ការធ្វើនយោបាយ នឹងអាចទទួលបានឡើងវិញនូវសិទ្ធិនយោបាយពេញលេញទៅតាមករណីដូចតទៅ៖

១. ការទទួលសិទ្ធិនយោបាយពេញលេញឡើងវិញដោយពេញច្បាប់ បន្ទាប់ពីផុតរយៈពេល នៃការហាមឃាត់ដែលកំណត់ដោយសាលដីការបស់តុលាការកំពូល

និង២. ការទទួលសិទ្ធិនយោបាយពេញលេញឡើងវិញ ដោយការផ្តល់សម្បទាដោយព្រះមហាក្សត្រ តាមសំណើរបស់នាយករដ្ឋមន្ត្រី តាមសេចក្តីស្នើសុំរបស់រដ្ឋមន្ត្រីក្រសួងមហាផ្ទៃ។

ដើម្បីធានាអនុវត្តចំពោះចំណុចទី២ខាងលើនេះ ក្រសួងមហាផ្ទៃ បានធ្វើការណែនាំអំពីបែបបទ និងនីតិវិធីសម្រាប់ការផ្តល់នីតិសម្បទាធ្វើនយោបាយឡើងវិញដូចតទៅ៖

-បុគ្គលដែលត្រូវបានតុលាការសម្រេចហាមឃាត់ការធ្វើសកម្មភាពនយោបាយ ត្រូវដាក់ពាក្យស្នើសុំនីតិសម្បទាឡើងវិញទៅក្រសួងមហាផ្ទៃ នៅរៀងរាល់ម៉ោងធ្វើការ។

-ពាក្យស្នើសុំត្រូវបានបញ្ជាក់អំពីអត្តសញ្ញាណរបស់បុគ្គលស្នើសុំ សេចក្តីសម្រេចរបស់តុលាការដែលហាមឃាត់ការធ្វើសកម្មភាពនយោបាយ ព្រមទាំងមានស្នាមម្រាមដៃនៃបុគ្គលដាក់ពាក្យស្នើសុំ។

-ពាក្យស្នើសុំត្រូវធ្វើឡើងដាច់ដោយឡែកពីគ្នា ដោយបុគ្គលដែលត្រូវបានតុលាការសម្រេចហាមឃាត់ធ្វើសកម្មភាពធ្វើនយោបាយ។

-បន្ទាប់ពីបានពិនិត្យលើពាក្យស្នើសុំរបស់បុគ្គលម្នាក់ៗ ដែលបានដាក់ពាក្យស្នើសុំក្រសួងមហាផ្ទៃ នឹងលើកសំណើជូននាយករដ្ឋមន្ត្រី ដើម្បីស្នើថ្វាយព្រះមហាក្សត្រ លើកលែងបម្រាមហាមឃាត់ធ្វើសកម្មភាពនយោបាយ ដោយអនុលោមតាមបទប្បញ្ញត្តិមាត្រា៤៥ថ្មី (ស្ទួនមួយ) នៃច្បាប់ស្តីពីគណបក្សនយោបាយ។

-សាម៉ីខ្លួននឹងអាចធ្វើសកម្មភាពនយោបាយឡើងវិញបាន ស្របតាមច្បាប់របស់ព្រះរាជាណាចក្រកម្ពុជា បន្ទាប់ពីមានព្រះរាជក្រឹត្យស្តីពីការផ្តល់នីតិសម្បទាឡើងវិញ៕