វៀតណាម មានមិត្តភក្តិបរទេសថ្មីមួយទៀតហើយ

2019-02-22 06:54:43
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រទេសវៀតណាម និងប្រទេសសូដង់ខាងត្បូង បានចុះហត្ថលេខាលើការបង្កើតទំនាក់ទំនងការទូតជាផ្លូវការ កាលពីថ្ងៃទី២១ ខែកុម្ភៈ ឆ្នាំ២០១៩។ ពិធីចុះហត្ថលេខានេះ ធ្វើឡើងនៅទីស្នាក់ការអង្គការសហប្រជាជាតិ (UN) ក្នុងទីក្រុងញ៊ូវយ៉ក សហរដ្ឋអាមេរិក រវាងលោក Dang Dinh Quy ឯកអគ្គរដ្ឋទូតវៀតណាមប្រចាំ UN និងលោក Akuei Bona Malwal ឯកអគ្គរដ្ឋទូតស៊ូដង់ខាងត្បូងប្រចាំ UN។

ភាគីទាំង២ បានយល់ព្រមផ្លាស់ប្តូរតំណាងការទូត កម្រិតឯកអគ្គរដ្ឋទូត និងគោរពតាមអនុសញ្ញាទីក្រុងវ្យែនឆ្នាំ១៩៦១ ស្តីពីទំនាក់ទំនងការទូត។ ជាមួយនឹងការចុះហត្ថលេខានេះ ធ្វើឱ្យវៀតណាម មានទំនាក់ទំនងការទូតជាមួយប្រទេសអាហ្វ្រិកដល់ ៥៤ ក្នុងចំណោម ៥៥ប្រទេសហើយ។

បន្ទាប់ពីពិធីចុះហត្ថលេខានេះ ឯកអគ្គរដ្ឋទូតប្រចាំ UN ទាំង២រូប បានបើកកិច្ចប្រជុំពិភាក្សាគ្នាដើម្បីជំរុញកិច្ចសហប្រតិបត្តិការរវាងប្រទេសទាំង២ នៅក្នុងបញ្ហាទ្វេភាគី និងចម្រុះភាគី។ ក្នុងនោះ វៀតណាម-ស៊ូដង់ខាងត្បូង នឹងបង្កើនកិច្ចសហការលើវិស័យកសិកម្ម ធនាគារ ប្រេង និងឧស្ម័ន។

ជាមួយគ្នានោះ ស៊ូដង់ខាងត្បូង ក៏បានសន្យាថា នឹងគាំទ្រវៀតណាម ឱ្យក្លាយជាសមាជិកមិនអចិន្ត្រៃយ៍នៃក្រុមប្រឹក្សាសន្តិសុខ UN សម្រាប់អាណត្តិឆ្នាំ ២០២០-២០២១ ផងដែរ៕

ប្រភព៖ Vietnam News ប្រែសម្រួល៖ សំភី