លោកស្រី អ៊ុងសាន ស៊ូជី ដកខ្លួនពីសន្និសីទ UN នៅក្រុងហ្សឺណែវ
- 2019-02-22 07:09:25
- ចំនួនមតិ 0 | ចំនួនចែករំលែក 0
លោកស្រី អ៊ុងសាន ស៊ូជី ដកខ្លួនពីសន្និសីទ UN នៅក្រុងហ្សឺណែវ
ចន្លោះមិនឃើញ
លោកស្រី អ៊ុងសាន ស៊ូជី បានដកខ្លួនចេញពីក្នុងរបៀបវារៈសម្រាប់សន្និសីទអង្គការសហប្រជាជាតិ (UN) នៅក្រុងហ្សឺណែវ ប្រទេសស្វីស ដែលនឹងប្រព្រឹត្តទៅនៅសប្ដាហ៍ក្រោយ។ រដ្ឋមន្ត្រីមួយរូប នឹងតំណាងឲ្យសហភាពមីយ៉ាន់ម៉ា នៅក្នុងជំនួបនេះ ជំនួសលោកស្រី ស៊ូជី វិញ។
កាលពីព្រឹកថ្ងៃទី២១កុម្ភៈ របៀបវារៈនៃសន្និសីទស្ដីពីការដកអាវុធ បង្ហាញថា លោកស្រី ស៊ូជី ដែលត្រូវបានរិះគន់ពីសំណាក់លោកខាងលិចចំពោះទង្វើលើជនជាតិភាគតិចរ៉ូហ៊ីងយ៉ា គ្រោងនឹងឡើងថ្លែងនៅម៉ោង១១ព្រឹក ថ្ងៃពុធ ទី២៧ កុម្ភៈ នៅសប្ដាហ៍ក្រោយ។ យ៉ាងណាមិញ នៅល្ងាចថ្ងៃដដែល របៀបវារៈត្រូវបានផ្លាស់ប្ដូរ ដោយលោក Kyaw Tin រដ្ឋមន្ត្រីកិច្ចសហប្រតិបត្តិការអន្តរជាតិ នឹងត្រូវឡើងថ្លែងជំនួសលោកស្រី ស៊ូជី វិញ។
មន្ត្រី UN បញ្ជាក់ថា មិនមានដំណឹងទាក់ទងនឹងលោកស្រី ស៊ូជី មកកាន់ក្រុងហ្សឺណែវ នោះទេ។ ចំណែក អ្នកនាំពាក្យរដ្ឋាភិបាលមីយ៉ាន់ម៉ា លោក Zaw Htay មិនបានឆ្លើយតបនឹងសំណួរឡើយ។
លោកស្រី ស៊ូជី ត្រូវបានសង្កេតឃើញថា បានគេចវេះក្នុងការធ្វើដំណើរទៅលោកខាងលិច ក៏ប៉ុន្តែលោកស្រី តែងតែទៅកាន់ប្រទេសនានានៅទ្វីបអាស៊ី។ ជាក់ស្ដែង កាលពីឆ្នាំ២០១៨ លោកស្រី បានទៅប្រទេសអូស្ត្រាលី ជប៉ុន សិង្ហបុរី វៀតណាម និង នេប៉ាល់។ លោកស្រី បានទៅកាន់ប្រទេសស្វីស កាលពីឆ្នាំ២០១២។
សូមជម្រាបថា ទំនាក់ទំនងរវាងរដ្ឋាភិបាលលោកស្រី ស៊ូជី និង UN កំពុងជួបនឹងវិបត្តិ ដោយសារបញ្ហារ៉ូហ៊ីងយ៉ានេះ។ មកទល់ពេលបច្ចុប្បន្ន ក្រុមរ៉ូហ៊ីងយ៉ាប្រហែល ៧៣០០០នាក់ បានរត់គេចពីអំពើហិង្សាដោយយោធាមីយ៉ាន់ម៉ា ទៅកាន់ប្រទេសបង់ក្លាដេស៕