"ភូមិកីឡា" ត្រៀមស្វាគមន៍ប្រតិភូអាស៊ីអាគ្នេយ៍ នៅស៊ីហ្គេម២០២៣

2019-02-22 08:04:20
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា បានសម្រេចកសាង «ភូមិកីឡា ឬ Sports Village» សម្រាប់រៀបចំការប្រកួតព្រឹត្តិការណ៍កីឡាអាស៊ីអាគ្នេយ៍ ឬ SEA Games ឆ្នាំ២០២៣ ដែលកម្ពុជាទទួលរៀបចំធ្វើម្ចាស់ផ្ទះជាលើកដំបូង។

ក្នុងសន្និបាតបូកសរុបការងារឆ្នាំ២០១៨ និងទិសដៅ២០១៩ របស់គណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃទី២១ ខែកុម្ភៈ លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធាន NOCC បានទម្លាយឲ្យដឹងថា ពេលនេះរាជរដ្ឋាភិបាលកម្ពុជា បានសម្រេចសាងសងភូមិកីឡាសម្រាប់រៀបចំការប្រកួតកីឡាស៊ីហ្គេមឆ្នាំ២០២៣។

លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជាបានប្រាប់ថា ការធ្វើភូមិកីឡាពិតជាសំខាន់ណាស់សម្រាប់ម្ចាស់ផ្ទះរៀបចំការប្រកួតព្រឹត្តិការណ៍កីឡាធំ ជាពិសេសកីឡាស៊ីហ្គេមតម្រូវឲ្យម្ចាស់ផ្ទះធ្វើភូមិកីឡា។ ការធ្វើភូមិកីឡាពិតជាងាយស្រួលក្នុងការគ្រប់គ្រងក្រុមកីឡាមកពីប្រទេសនីមួយៗ កាត់បន្ថយការចំណាយ មានសុវត្ថិភាពខ្ពស់ និងមិនដឹកជញ្ជូនច្រើន។

លោកបន្តថា និយាយឲ្យងាយស្រួលគឺគណៈប្រតិភូនៃប្រទេសនីមួយៗចេញពីព្រលានយន្តហោះឆ្ពោះទៅភូមិកីឡាដែលស្នាក់នៅ អាហារនៅកន្លែងតែមួយ ហើយចេញពីកន្លែងស្នាក់នៅទៅទីលានប្រកួតដែលនៅកៀកបង្កើយ លើកលែងតែកីឡាខ្លះដែលត្រូវប្រកួតនៅសមុទ្រទើបស្នាក់នៅសណ្ឋាគារ។

តាមការបញ្ជាក់ពីតំណាងគណៈកម្មាធិការជាតិអូឡាំពិកកម្ពុជាថា ភូមិកីឡា អាចចំណាយពេល៣ឆ្នាំហើយទើបសាងសង់រួចរាល់។ ការសាងសង់ប្រហែលជាចាប់ផ្តើមនៅឆ្នាំ២០១៩នេះ ប៉ុន្តែនៅមិនទាន់ច្បាស់អំពីការចំណាយ និងកម្ពស់នៃអគារភូមិកីឡាប៉ុន្មានជាន់នៅឡើយទេ៕