ចិនសន្យាបន្តសាងសង់កំណាត់ផ្លូវជាតិលេខ៧ ជិត ១០០គីឡូម៉ែត្របន្ថែមទៀត ដល់ព្រំដែនឡាវ

2019-02-26 02:02:09
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ភាគីចិនបានសន្យាបន្តសាងសង់កំណាត់ផ្លូវជាតិលេខ៧ ប្រវែង ៩៦ គីឡូម៉ែត្របន្ថែមទៀត ភ្ជាប់ពីចំណុចរមៀត ឃុំអូរគ្រៀង ស្រុកសំបូរ ខេត្តក្រចេះ ដល់ព្រំដែនប្រទេសឡាវ តាមរយៈឥណទានជំនួយឥតសំណងរបស់រដ្ឋាភិបាលចិន។ នេះបើតាមការបញ្ជាក់របស់លោក លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន ក្នុងពេលលោកចុះពិនិត្យស្ថានភាពគម្រោងសាងសង់កំណាត់ផ្លូវជាតិលេខ៧ប្រវែង ៩៣,៥៦៥គីឡូម៉ែត្រ នៅខេត្តក្រចេះ កាលពីរសៀលថ្ងៃទី២៤ ខែកុម្ភៈ ឆ្នាំ២០១៩។

លោកបានឱ្យដឹងថា កំណាត់ផ្លូវជាតិលេខ៧ ពីចំណុចគីឡូម៉ែត្រលេខ៣៣១ (រង្វង់មូលខ្លាស្ទុះ) ស្ថិតក្នុងភូមិកាប៉ូ សង្កាត់អូរឫស្សី ក្រុងក្រចេះ រហូតដល់ចំណុចគីឡូម៉ែត្រលេខ៤២៤ ចំណុចឃុំអូរគ្រៀង ស្រុកសំបូរ ប្រវែង ៩៣,៥៦៥គីឡូម៉ែត្រ ត្រូវបានស្ដារឡើងវិញចាប់តាំងពីខែមេសា ឆ្នាំ២០១៦ និងស្ថាបនាជួសជុលរួចរាល់ជាស្ថាពរ នៅក្នុងខែធ្នូ ឆ្នាំ២០១៨ កន្លងទៅ។

សូមជម្រាបថា គម្រោងស្តារឡើងវិញកំណាត់ផ្លូវជាតិលេខ៧ ដែលជាជំនួយឥតសំណងរបស់ចិនតម្លៃជិត ៤០លានដុល្លារនេះ ត្រូវបានក្រាលបេតុងកៅស៊ូ AC កម្រាស់ ០,១០ម៉ែត្រ និងបំពាក់គ្រឿងសង្ហារឹមផ្លូវថ្នល់គ្រប់គ្រាន់ ដែលអនុវត្តការងារដោយក្រុមហ៊ុនសំណង់សៀងហៃគ្រុប (SCG)។

ជាមួយគ្នានេះ លោករដ្ឋលេខាធិការ ក៏បានអំពាវនាវឱ្យម្ចាស់អាជីវកម្ម ម្ចាស់យានយន្ត ធុនធំគ្រប់ប្រភេទ ដែលកំពុងចរាចរ ប្រើប្រាស់លើដងផ្លូវជាតិទាំងអស់ កុំដឹកជញ្ជូនផ្ទុកលើសទម្ងន់ពីច្បាប់កំណត់ និងចូលរួមថែរក្សា ការពារនូវសមិទ្ធផលនានា ជាពិសេសសមិទ្ធផលផ្លូវជាតិលេខ ៧នេះតែម្ដង ដែលជាជំនួយឥតសំណងលើកទីមួយរបស់ចិនមកកម្ពុជា និងជាប្រយោជន៍ សាធារណៈសម្រាប់បងប្អូនប្រជាពលរដ្ឋប្រើប្រាស់៕