ជំនួបត្រាំ-គីម លើកទី២ ចាប់ផ្ដើមនៅទីតាំងណា? ម៉ោងប៉ុន្មាន?

2019-02-27 01:56:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

លោកប្រធានាធបតីអាមេរិក ដូណាល់ ត្រាំ និងមេដឹកនាំកូរ៉េខាងជើងលោក គីម ជុងអ៊ុន នឹងជួបគ្នានៅវេលាម៉ោង ៦:៣០ នាទីល្ងាច នៅសណ្ឋាគារ Metropole នាក្រុងហាណូយ ។ មានន័យថា ជំនួបលើកទី២នេះ មេដឹកនាំទាំងពីរ ជួបគ្នានៅពេលល្ងាច ខុសពីជំនួបលើកទី១ នៅសិង្ហបុរី កាលពីខែមិថុនា ឆ្នាំ២០១៨ ដែលធ្វើឡើងនៅពេលព្រឹក ដល់ពេលរសៀល។

សណ្ឋាគារ Metropole

ជំនួបលើកទី២នេះ ធ្វើឡើងរយៈពេល ២ថ្ងៃ ចាប់ពីថ្ងៃទី២៧ ដល់ ២៨ ខែកុម្ភៈ ឆ្នាំ២០១៩។ ដោយឡែក ជំនួបលើកទី១ ធ្វើឡើងត្រឹមតែ ១ថ្ងៃប៉ុណ្ណោះ គឺនៅថ្ងៃទី១២ ខែមិថុនា ឆ្នាំ២០១៨។

លោក ដូណាល់ ត្រាំ និង លោក គីម ជុងអ៊ុន នឹងជួបគ្នានៅសណ្ឋាគារ Metropole ដែលមានរចនាបថបែបបារាំង រួចហើយនឹងធ្វើការសន្ទនាគ្នា ១ទល់នឹង១ រយៈពេល ២០នាទី មុននឹងចូលតុទទួលទានអាហារពេលល្ងាច ដែលមានរយៈពេលប្រហែល ១ម៉ោងកន្លះ តែប៉ុណ្ណោះ។ ជំនួបសំខាន់ នឹងត្រូវធ្វើឡើងនៅថ្ងៃព្រហស្បតិ៍ ទី២៨ ខែកុម្ភៈ ឆ្នាំ២០១៩។ ជំនួបនេះ ផ្ដោតសំខាន់លើការរំសាយទាំងស្រុង នូវកម្មវិធីនុយក្លេអ៊ែររបស់កូរ៉េខាងជើង។

សូមជម្រាបថា លោក ដូណាល់ ត្រាំ បានទៅដល់ប្រទេសវៀតណាម តាមជើងហោះហើររបស់ប្រធានាធិបតីអាមេរិក Air Force One កាលពីយប់ថ្ងៃអង្គារ ទី២៦កុម្ភៈ ក្រោយការទៅដល់របស់លោក គីម ជុងអ៊ុន ដែលលោកបានធ្វើដំណើរតាមរថភ្លើង ចំណាយពេល ២ថ្ងៃកន្លះ ទៅដល់នៅពេលព្រឹកថ្ងៃដដែល។

យោងតាមទីភ្នាក់ងារសារព័ត៌មាន KCNA លោក គីម ជុងអ៊ុន នឹងធ្វើទស្សនកិច្ចនៅប្រទេសវៀតណាម រហូតដល់ថ្ងៃសៅរ៍ ទី២ ខែមីនា ឆ្នាំ២០១៩។ ចំណែក លោក ដូណាល់ ត្រាំ នឹងចាកចេញពីប្រទេសវៀតណាម ក្រោយចប់កិច្ចប្រជុំ នៅថ្ងៃព្រហស្បតិ៍ ទី២៨ ខែកុម្ភៈ ឆ្នាំ២០១៩៕

ប្រភព៖ CNN | Channelnewsasia ប្រែសម្រួល៖ លាភ.