លោក ដូណាល់ ត្រាំ ថាកូរ៉េខាងជើង នឹងរីកចម្រើនដូចវៀតណាម ប្រសិនបើបោះបង់នុយក្លេអ៊ែរ

2019-02-27 06:30:27
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ប្រធានាធិបតីអាមេរិកលោក ដូណាល់ ត្រាំ បានលើកឡើងថា វៀតណាម ជាប្រទេសដែលកំពុងរីកចម្រើន ហើយកូរ៉េខាងជើង ក៏នឹងអាចរីកចម្រើនដូចវៀតណាមដែរ ប្រសិនបើបោះបង់ចោលនុយក្លេអ៊ែរ។ នេះបើតាមការបង្ហោះនៅលើបណ្តាញ Twitter របស់លោក ដូណាល់ ត្រាំ នាព្រឹកថ្ងៃទី២៧ ខែកុម្ភៈ ឆ្នាំ២០១៩ ក្រោយពេលលោកបានទៅដល់វៀតណាម កាលពីយប់មិញ។

លោក ដូណាល់ ត្រាំ ដែលកំពុងស្ថិតក្នុងប្រទេសវៀតណាម (រូបថតផ្តល់សិទ្ធិដោយ Reuters)

លោកអះអាងថា ការបោះបង់នុយក្លេអ៊ែររបស់កូរ៉េខាងជើង គឺជារឿងដ៏អស្ចារ្យ និងជាឱកាសដ៏ធំមួយ សម្រាប់មិត្តភក្តិរបស់លោក គឺលោក គីម ជុងអ៊ុន។ «យើងនឹងដឹងឆាប់ៗនេះហើយ»។

ការលើកឡើងខាងលើនេះ គឺធ្វើឡើងតែប៉ុន្មានម៉ោងប៉ុណ្ណោះ មុនពេលដែលលោក ដូណាល់ ត្រាំ នឹងជួបជាមួយលោក គីម ជុងអ៊ុន មេដឹកនាំកូរ៉េខាងជើង នៅក្រុងហាណូយ ប្រទេសវៀតណាម។ មេដឹកនាំទាំង២ នឹងជួបគ្នានៅម៉ោង ៦កន្លះល្ងាចនេះ នៅសណ្ឋាគារ Metropole។

នៅថ្ងៃទី២៨កុម្ភៈស្អែកនេះ ភាគីទាំង២ នឹងមានជំនួបដ៏សំខាន់ ដែលផ្តោតលើការរំសាយទាំងស្រុង នូវកម្មវិធីនុយក្លេអ៊ែររបស់កូរ៉េខាងជើង។

បន្ថែមពីនេះ លោក ដូណាល់ ត្រាំ ក៏បានបន្ទោសដល់ក្រុមអ្នកនយោបាយនៃគណបក្សប្រជាធិបតេយ្យរបស់អាមេរិកផងដែរ ដែលលោកបានស្នើឱ្យបញ្ឈប់ការនិយាយនូវអ្វីដែលលោកកំពុងធ្វើជាមួយកូរ៉េខាងជើងនេះ៕

ប្រភព៖ Yonhapnews ប្រែសម្រួល៖ សំភី