ផ្កាយរណបប្រទេសអាស៊ានមួយ បានជិះលើគ្រាប់រ៉ុកកែតរបស់ SpaceX

2019-02-27 06:32:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ផ្កាយរណបចែកចាយអ៊ីនធឺណិតរបស់ក្រុមហ៊ុន Pasifik Satelit Nusantara (PSN) នៅក្រុងហ្សាកាតា ប្រទេសឥណ្ឌូណេស៊ី ត្រូវបានបំពាក់លើគ្រាប់រ៉ុកកែតរបស់ក្រុមហ៊ុន SpaceX ដែលត្រូវបានបាញ់បង្ហោះ ពីរដ្ឋផ្លរីដា សហរដ្ឋអាមេរិក កាលពីថ្ងៃសុក្រ សប្ដាហ៍កន្លងទៅ។

ផ្កាយរណបដែលត្រូវបានបំពាក់លើគ្រាប់រ៉ុកកែតរបស់ក្រុមហ៊ុនអវកាសអាមេរិកនេះ ជាផ្កាយរណបទី៦ របស់ឥណ្ឌូណេស៊ី ដែលមានសមត្ថភាពបំផុត ដើម្បីតភ្ជាប់ផ្នែកជីឌីថលនៅក្នុងប្រទេសឥណ្ឌណេស៊ី ព្រមទាំងជំរុញសកម្មភាពសេដ្ឋកិច្ចក្នុងតំបន់ ដែលនៅក្រៅកោះចាវា។

ផ្កាយរណបនេះ ស្ថិតក្រោមគម្រោងដែលមានតម្លៃ ២៣០លានដុល្លារអាមេរិក ដែលទទួលបានពីមូលនិធិផ្ទាល់របស់ PSN ចំនួន ៣០% និង ទីភ្នាក់ងារឥណទាននាំចេញ Export Development Canada របស់ប្រទេសកាណាដា ចំនួន ៧០%។

ជាមួយផ្កាយរណបរបស់ឥណ្ឌូណេស៊ី គ្រាប់រ៉ុកកែតរបស់ SpaceX ដែលជាក្រុមហ៊ុនឯកជនអាមេរិក ក៏បានបំពាក់ឧបករណ៍ ២ផ្សេងទៀតផងដែរ ក្នុងនោះមាន យានអវកាសពិសោធន៍ទ័ពអាកាសអាមេរិក និងយានចុះចតលើព្រះចន្ទរបស់ប្រទេសអ៊ីស្រាអែល។

ក្រុមហ៊ុន PSN បានប៉ាន់ស្មានថា ប្រជាជនឥណ្ឌូណេស៊ីយ៉ាងតិច ២៥លាននាក់ ភាគច្រើននៅប៉ែកខាងកើតប្រទេស មិនមានអ៊ីនធឺណិតប្រើប្រាស់ទេ។ តាមរយៈគម្រោងផ្កាយរណបចែកចាយអ៊ីនធឺណិតនេះ PSN ត្រូវបានរំពឹងថា នឹងរកចំណូលបាន ៥៥លានដុល្លារអាមេរិកក្នុងមួយឆ្នាំ៕

ប្រភព៖ The Jakarta Post ប្រែសម្រួល៖ លាភ.