ប៉ាគីស្ថាន បាញ់ទម្លាក់យន្តហោះចម្បាំងឥណ្ឌា ២គ្រឿង

2019-02-27 08:51:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

មន្ត្រីជាន់ខ្ពស់ប៉ាគីស្ថាន បានអះអាងថា ខ្លួនបានបាញ់ទម្លាក់យន្តហោះចម្បាំងរបស់កងទ័ពអាកាសឥណ្ឌា ចំនួន ២គ្រឿង នៅថ្ងៃពុធ ទី២៧ ខែកុម្ភៈនេះ។ ការអះអាងដូច្នេះ គឺបន្ទាប់ពីយន្តហោះចម្បាំងឥណ្ឌា បានបើកការវាយប្រហារក្នុងដែនអាកាសរបស់ប៉ាគីស្ថាន កាលពីថ្ងៃទី២៦កុម្ភៈ និងជាការវាយប្រហារលើកទី១ គិតចាប់ពីសង្គ្រាមឆ្នាំ១៩៧១ មក។

បំណែកយន្តហោះចម្បាំងឥណ្ឌា ដែលបានធ្លាក់ (រូបថត៖ Reuters)

ភាពតានតឹងបានផ្ទុះឡើង ក្រោយករណីបំផ្ទុះរថយន្តអត្តឃាត ដោយក្រុមសកម្មប្រយុទ្ធ Jaish-e-Mohammed (JeM) ដែលមានប្រភពពីប៉ាគីស្ថាន នៅក្នុងរដ្ឋ Kashmir នៃប្រទេសឥណ្ឌា។ ហេតុការណ៍នេះ បានសម្លាប់ប៉ូលិសឥណ្ឌា យ៉ាងតិច ៤០នាក់ កាលពីថ្ងៃទី១៤ ខែកុម្ភៈកន្លងទៅ។

ក្រោយការបំផ្ទុះគ្រាប់បែកនេះ ទ័ពអាកាសឥណ្ឌា បានបញ្ជូនយន្តហោះចម្បាំង បើកការវាយប្រហារត្រឡប់ទៅលើជំរំរបស់ក្រុមសកម្មប្រយុទ្ធ JeM នៅក្នុងទឹកដីប៉ាគីស្ថានវិញ។ ឥណ្ឌាអះអាងថា ក្រុម JeM ជាច្រើនត្រូវបានសម្លាប់ ខណៈមន្ត្រីប៉ាគីស្ថានវិញថា ការវាយប្រហាររបស់យន្តហោះចម្បាំងឥណ្ឌា ទទួលបរាជ័យ និងមិនបង្កឲ្យក្រុម JeM ស្លាប់ឡើយ។

យន្តហោះចម្បាំងរបស់កងទ័ពអាកាសឥណ្ឌា

នៅថ្ងៃពុធ ទី២៧កុម្ភៈនេះ ទ័ពអាកាសឥណ្ឌា បានបន្តបញ្ជូនយន្តហោះចម្បាំងចូលទៅក្នុងដែនអាកាសរបស់ប៉ាគីស្ថានជាថ្មី បន្ទាប់ពីប៉ាគីស្ថាន បានវាយប្រហារពីដែនអាកាសរបស់ឥណ្ឌា នៅតំបន់ Kashmir ។ យ៉ាងណាក៏ដោយ លោកឧត្ដមសេនីយ៍ទោ Asif Ghafoor អ្នកនាំពាក្យកងទ័ពប៉ាគីស្ថាន បានបញ្ជាក់លើបណ្ដាញទំនាក់ទំនងសង្គម Twitter ថា យន្តហោះឥណ្ឌា ២គ្រឿង ត្រូវបានបាញ់ទម្លាក់។

លោកបន្តថា ក្នុងចំណោមយន្តហោះទាំងពីរគ្រឿង មួយបានធ្លាក់នៅរដ្ឋ Kashmir របស់ឥណ្ឌា ឯមួយទៀត ធ្លាក់នៅក្នុងទឹកដីប៉ាគីស្ថាន ហើយពីឡុតត្រូវបានចាប់ខ្លួន។

ជុំវិញករណីនេះ អ្នកនាំពាក្យក្រសួងការពារជាតិឥណ្ឌា មិនអាចទាក់ទងសុំការបំភ្លឺបានឡើយ។

ដោយឡែក ប៉ូលិសឥណ្ឌាអះអាងថា ពីឡុត ២នាក់ និងជនស៊ីវិលម្នាក់ បានស្លាប់ ក្រោយហេតុការណ៍ធ្លាក់យន្តហោះចម្បាំងរបស់កងទ័ពអាកាសឥណ្ឌា នៅរដ្ឋ Kashmir តែមិនបានបញ្ជាក់ពីប្រភពដែលបានបាញ់ទម្លាក់នោះទេ។ ប៉ូលិសឥណ្ឌាបន្តថា យន្តហោះចម្បាំងប៉ាគីស្ថានចំនួន ៣គ្រឿង ក៏បានចូលទៅក្នុងដែនអាកាសរបស់ខ្លួនផងដែរ មុនត្រូវបានស្ទាក់ និងបង្ខំឲ្យបកក្បាលត្រឡប់ក្រោយ៕

ប្រភព៖ Reuters ប្រែសម្រួល៖ លាភ.