ការជួសជុលស្ពានជ្រោយចង្វារទី១ សម្រេចបានជិត ១០០% ហើយ
- 2019-02-28 01:53:18
- ចំនួនមតិ 0 | ចំនួនចែករំលែក 0
ការជួសជុលស្ពានជ្រោយចង្វារទី១ សម្រេចបានជិត ១០០% ហើយ
ចន្លោះមិនឃើញ
ក្រសួងសាធារណការ និងដឹកជញ្ជូន បានឱ្យដឹងកាលពីថ្ងៃទី២៧ ខែកុម្ភៈ ឆ្នាំ២០១៩ថា គម្រោងជួសជុលឡើងវិញស្ពានមិត្តភាពកម្ពុជា-ជប៉ុន (ស្ពានជ្រោយចង្វារទី១) បានប្រព្រឹត្តទៅយ៉ាងរលូន ដោយសម្រេចបាន ៩៧% លឿនជាងការគ្រោងទុក ១១%។
កាលពីម្សិលមិញនេះ លោក តូច ចាន់កុសល រដ្ឋមន្ត្រីស្តីទីក្រសួងសាធារណការ និងដឹកជញ្ជូន បានចុះត្រួតពិនិត្យវឌ្ឍនភាពការងារនៃគម្រោងស្តារឡើងវិញស្ពានមិត្តភាពកម្ពុជា-ជប៉ុននេះ ដើម្បីធានាថាស្ពាននេះ អាចត្រូវដាក់ឱ្យសាធារណជនប្រើប្រាស់ បានមុនថ្ងៃបុណ្យចូលឆ្នាំខ្មែរខាងមុខនេះ។
ក្រសួងសាធារណការ និងដឹកជញ្ជូន ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេសជប៉ុន ប្តេជ្ញាចិត្តបញ្ចប់ការងារដែលនៅសេសសល់ ដើម្បីដាក់ស្ពាននេះឱ្យដំណើរការក្នុងគោលបំណងសម្រួលដល់ការធ្វើចរាចរណ៍របស់ប្រជាពលរដ្ឋក្នុងកំឡុងពេលបុណ្យចូលឆ្នាំខ្មែរខាងមុខនេះ។
សូមជម្រាបថា គម្រោងស្តារឡើងវិញស្ពានជ្រោយចង្វារទី១នេះ ជាហិរញ្ញប្បទាន ឥតសំណងរបស់រដ្ឋាភិបាលជប៉ុន ដែលត្រូវបានចុះហត្ថលេខា នៅថ្ងៃទី៣១ ខែមីនា ឆ្នាំ២០១៦។ គម្រោងនេះបានចាប់ផ្តើមការជួសជុលសាងសង់នៅថ្ងៃទី១៥ ខែកញ្ញា ឆ្នាំ២០១៧ ដោយមានក្រុមហ៊ុន Obayashi ជាក្រុមហ៊ុនទទួលបានសិទ្ធិក្នុងការជួសជុលសាងសង់ និងក្រុមហ៊ុន Central Consultant Inc ជាក្រុមហ៊ុនទីប្រឹក្សាបច្ចេកទេស៕