ថៃ បិទជើងហោះហើរទៅអឺរ៉ុបទាំងអស់ ជាបណ្ដោះអាសន្ន

2019-02-28 02:07:29
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

ក្រុមហ៊ុនអាកាសចរណ៍ Thai Airways បានប្រកាសថា ខ្លួនបានសម្រេចបិទជើងហោះហើរទាំងឡាយ ដែលហោះទៅកាន់ប្រទេសប៉ាគីស្ថាន និងទ្វីបអឺរ៉ុប បន្ទាប់ពីប៉ាគីស្ថាន បិទដែនអាកាសរបស់ខ្លួន ក្រោយភាពតានតឹងជាមួយនឹងប្រទេសឥណ្ឌា។

អ្នកដំណើររង់ចាំនៅព្រលានយន្តហោះ សុវណ្ណាភូមិ នាក្រុងបាងកក ក្រោយជើងហោះហើរត្រូវបានលុបចោល (រូបថត៖ Twitter/@js100radio)

ចំពោះជើងហោះហើរនានា ដែលកំពុងធ្វើដំណើរ ត្រូវបានបញ្ជាឲ្យបកក្បាលត្រឡប់មកកាន់ព្រលានយន្តហោះសុវណ្ណាភូមិ នៅក្រុងបាងកកវិញ។

នៅយប់ថ្ងៃពុធ ទី២៧ និងព្រឹកថ្ងៃព្រហស្បតិ៍ ទី២៨ ខែកុម្ភៈនេះ អាកាសចរណ៍ Thai Airways បានលុបចោលជើងហោះហើរចំនួន ១១ ពីក្រុងបាងកក ទៅអឺរ៉ុប ដោយសារព្រួយបារម្ភពីបញ្ហាសុវត្ថិភាព។ ជាមួយគ្នានេះ ជើងហោះហើរ ដែលចាកចេញពីអឺរ៉ុប បម្រុងចុះចតនៅថៃ ក៏ត្រូវបានលុបចោលផងដែរ។

ការបិទជើងហោះហើរជាបណ្ដោះអាសន្ននេះ គឺដើម្បីទុកពេលឲ្យក្រុមហ៊ុនពិនិត្យលើស្ថានភាពរវាងប៉ាគីស្ថាន និងឥណ្ឌា។

កាលពីរសៀលថ្ងៃពុធ រដ្ឋាភិបាលឥណ្ឌា ក៏បានប្រកាសបិទដែនអាកាសរបស់ខ្លួនមួយផ្នែក ដែលស្ថិតនៅប៉ែកខាងជើងប្រទេសផងដែរ។

សូមជម្រាបថា ភាពតានតឹងរវាងប៉ាគីស្ថាន និងឥណ្ឌា ត្រូវបានបង្កឡើងជាថ្មី ក្រោយពីការប៉ះទង្គិចនាពេលថ្មីៗកន្លងទៅ។ កាលពីថ្ងៃទី២៧កុម្ភៈ យន្តហោះចម្បាំង ២គ្រឿងរបស់កងទ័ពអាកាសឥណ្ឌា ត្រូវបានបាញ់ទម្លាក់ នៅក្នុងដែនអាកាសរបស់ប៉ាគីស្ថាន ក្នុងនោះ ពីឡុតម្នាក់ត្រូវបានប៉ាគីស្ថានចាប់ខ្លួន៕

អត្ថបទទាក់ទង ប៉ាគីស្ថាន បាញ់ទម្លាក់យន្តហោះចម្បាំងឥណ្ឌា ២គ្រឿង

ប្រភព៖ The Nation ប្រែសម្រួល៖ លាភ.