ជប៉ុន ចាប់ដៃជាមួយកម្ពុជា បង្កើតទីក្រុងឆ្លាតវៃ នៅភ្នំពេញ បាត់ដំបង និងសៀមរាប

2019-02-28 02:30:34
ចំនួនមតិ 0 | ចំនួនចែករំលែក 0

ចន្លោះមិនឃើញ

ពាណិជ្ជកម្ម

កម្ពុជា និងជប៉ុន បានបើកវេទិកាសាធារណៈ-ឯកជនលើកទី១ ស្តីពីការអភិវឌ្ឍនគរូបនីយកម្មកម្ពុជា-ជប៉ុន ដើម្បីចែករំលែកបទពិសោធពាក់ព័ន្ធនឹងការរៀបចំទីក្រុង និងការគ្រប់គ្រងប្រព័ន្ធលូទឹកកខ្វក់ រួមទាំងផ្តល់គំនិតដល់ការរៀបចំបង្កើតទីក្រុងឆ្លាតវៃ (Smart Cities) នៅកម្ពុជា និងដើម្បីពង្រីកលម្ហធុរកិច្ចកម្ពុជា-ជប៉ុន។ វេទិកានេះ ធ្វើឡើងក្រោមអធិបតីភាពលោក ជា សុផារ៉ា ឧបនាយករដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ ដោយមានការចូលរួមពីលោក YUKI Fumihiko អនុរដ្ឋមន្រ្តីនៃក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន កាលពីថ្ងៃទី២៧ ខែកុម្ភៈ ឆ្នាំ២០១៩ នៅសណ្ឋាគារកាំបូឌីយ៉ាណា។

យោងតាមសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា អង្គវេទិកានេះ បានធ្វើការពិភាក្សា និងផ្លាស់ប្តូរបទពិសោធរយៈពេលពេញមួយថ្ងៃ ដោយទទួលបានលទ្ធផលដូចខាងក្រោម៖

១.បង្កលក្ខណៈដល់ក្រុមហ៊ុនជប៉ុន និងក្រុមហ៊ុនកម្ពុជា ចាប់ដៃគូវិនិយោគរួមគ្នា ជាពិសេសលើអភិវឌ្ឍអចលនទ្រព្យ ការអភិវឌ្ឍសំណង់លំនៅឋាន ពាណិជ្ជកម្ម សេវាកម្ម ឧស្សាហកម្ម ហេដ្ឋារចនាសម្ព័ន្ធរូបវន្ត បរិស្ថានទីក្រុង ការរៀបចំទីក្រុង និងរួមចំណែកក្នុងការបង្កើតទីក្រុងឆ្លាតវៃ។

២. ជប៉ុនជួយគាំទ្របង្កើតទីក្រុងឆ្លាតវៃ នៅកម្ពុជា ដោយចាប់ផ្តើមពីរាជធានីភ្នំពេញ ក្រុងបាត់ដំបង និងក្រុងសៀមរាប ដែលជាតំបន់គំរូ។

៣. ជប៉ុនជួយគាំទ្រ និងរួមចំណែកដល់ការរៀបចំបង្កើតបណ្តាញទីក្រុងឆ្លាតវៃ អាស៊ាន-ជប៉ុន និងការបង្កើតវេទិកាសាធារណៈ-ឯកជន ស្តីពីការអភិវឌ្ឍនគរូបនីយកម្មអាស៊ាន-ជប៉ុន នាពេលខាងមុខ។

៤. នៅខែតុលា ឆ្នាំ២០១៩ នៅទីក្រុងតូក្យូ រដ្ឋាភិបាលជប៉ុន នឹងរៀបចំកិច្ចប្រជុំមន្រ្តីជាន់ខ្ពស់នៃបណ្តាញទីក្រុងឆ្លាតវៃអាស៊ាន ដើម្បីពិភាក្សាអំពីការរីកចម្រើន ចែករំលែកបទពិសោធ និងដោះស្រាយបញ្ហាប្រឈម។ នៅឆ្នាំ២០២០ នៅទីរួមខេត្តសៀមរាប ក្រសួងរៀបចំដែនដី នគរូបនីយកម្ម និងសំណង់កម្ពុជា សហការជាមួយក្រសួងដីធ្លី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ជប៉ុន រៀបចំវេទិកាសាធារណៈ-ឯកជន ស្តីពីការអភិវឌ្ឍនគរូបនីយកម្មកម្ពុជា-ជប៉ុន លើកទី២។

៥. នៅពាក់កណ្តាលខែមីនា ឆ្នាំ២០១៩ ជប៉ុន នឹងបញ្ជូនអ្នកបច្ចេកទេសមកសិក្សាដំឡើងផ្កាយរណប គាំទ្រដល់ការងាររៀបចំស្ថានីយវាស់វែងអចិន្ត្រៃយ៍នៅកម្ពុជា ដើម្បីបម្រើដល់ការងារវាស់វែង និងផលិតផែនទី៕

អត្ថបទ៖ សំភី